نادوز ووکیشنل انسٹی ٹیوٹ نے محکمہ ترقیٔ نسواں، حکومتِ سندھ کے اشتراک سے کراچی جیل میں خواتین قیدیوں کے لیے اسکل ڈیولپمنٹ پروگرام کا انعقاد کیا، جس کا اختتام باوقار تقریبِ تقسیمِ اسناد پر ہوا۔ تربیت مکمل کرنے والی خواتین میں سرٹیفکیٹس تقسیم کیے گئے۔
وزیراعلیٰ سندھ سید مراد علی شاہ کی بھینس کالونی ملیر آمد، جیئے بھٹو کے نعروں سے استقبال
تقریب میں صوبائی وزیر برائے ترقیٔ نسواں شاہینہ شیر علی نے بطور مہمانِ خصوصی شرکت کی۔ اپنے خطاب میں انہوں نے کہا کہ فنی تربیت خواتین کی بحالی اور باوقار انداز میں معاشرے میں واپسی کے لیے نہایت اہم ہے۔ ان کا کہنا تھا کہ اس طرح کے اقدامات خواتین کو خودمختار بنانے اور انہیں باعزت روزگار کے مواقع فراہم کرنے میں معاون ثابت ہوتے ہیں۔
مہمانِ اعزاز فدا حسین مستوئی، آئی جی سندھ پریزنز اینڈ کریکشن سروسز نے کہا کہ جیلوں میں اصلاحی اقدامات وقت کی اہم ضرورت ہیں اور ہنر مندی کی تربیت قیدیوں کو رہائی کے بعد باوقار روزگار حاصل کرنے میں مدد دیتی ہے۔
تقریب میں ڈی آئی جی محترمہ شیبا شاہ، اعزازی قونصل جنرل مراکش جناب اشتیاق، چیئرمین کنزیومرز ایسوسی ایشن آف پاکستان کوکب اقبال اور سی ای او WalkEze شہزاد مبین سمیت مختلف شعبہ ہائے زندگی سے تعلق رکھنے والی شخصیات نے شرکت کی۔
مقررین نے نادوز ووکیشنل انسٹی ٹیوٹ اور محکمہ ترقیٔ نسواں کی مشترکہ کاوشوں کو سراہتے ہوئے کہا کہ ایسے فلاحی اور اصلاحی پروگرام خواتین قیدیوں کو معاشرے کا فعال اور باوقار رکن بنانے میں کلیدی کردار ادا کرتے ہیں۔
تقریب کے اختتام پر تربیت مکمل کرنے والی خواتین میں اسناد تقسیم کی گئیں اور اس عزم کا اعادہ کیا گیا کہ مستقبل میں بھی اس نوعیت کے اصلاحی اقدامات جاری رکھے جائیں گے۔