کراچی بچاؤ تحریک نے گجر، محمود آباد اور اورنگی نالہ سمیت گل پلازہ کے متاثرین کی بحالی، پلاٹوں کی الاٹمنٹ اور معاوضوں کی ادائیگی کے مطالبات کے حق میں کراچی پریس کلب پر جلسہ منعقد کیا۔ تحریک کے رہنماؤں نے اعلان کیا کہ اگر وعدوں پر عملدرآمد نہ ہوا تو وزیراعلیٰ ہاؤس تک مارچ کیا جائے گا۔
کراچی جیل میں خواتین قیدیوں کے لیے اسکل ڈیولپمنٹ پروگرام، تقریبِ اسناد کا انعقاد
تحریک کے مطابق یکم فروری 2026 کو بھی پلاٹوں کی الاٹمنٹ، معاوضے کی ادائیگی اور گمشدہ آئی ڈیز کے مسئلے پر احتجاج کیا گیا تھا۔ 15 فروری کو وزیراعلیٰ ہاؤس کی جانب مارچ کا فیصلہ کیا گیا تھا، تاہم اسسٹنٹ کمشنر کی یقین دہانی پر متاثرین کے نمائندوں نے کمشنر آفس میں مذاکرات کیے۔
مذاکرات کے بعد احتجاج کو پریس کلب منتقل کر کے جلسے کی صورت اختیار دی گئی، جہاں نمائندوں نے عوام کو کمشنر آفس میں ہونے والی پیش رفت سے آگاہ کیا۔
تسلیم شدہ مطالبات
تحریک کے مطابق اسسٹنٹ کمشنر آفس کی جانب سے درج ذیل امور پر پیش رفت کی یقین دہانی کرائی گئی:
کمشنر آفس، Karachi Development Authority کے ساتھ مل کر سپریم کورٹ کے احکامات کے مطابق تجاوزات کے خاتمے کے عمل کو محدود کرے گا اور 25 فٹ سے زائد کٹنگ نہیں کی جائے گی۔
ایک فوکل پرسن مقرر کیا جائے گا تاکہ متاثرین کسی بھی اضافی کٹنگ کی شکایت درج کرا سکیں۔
گجر، محمود آباد اور اورنگی نالہ کی 1200 سے زائد منظور شدہ آئی ڈیز کو فوری طور پر معاوضہ اور پلاٹ الاٹ کیے جائیں گے۔
مسترد کی گئی 172 آئی ڈیز کی وجوہات سامنے لائی جائیں گی۔
گمشدہ آئی ڈیز کی فہرست کابینہ، چیف سیکرٹری اور وزیراعلیٰ کے ساتھ شیئر کر کے 30 روز میں پیش رفت سے آگاہ کیا جائے گا۔
جون 2023 سے بند کرائے گئے کرائے کے چیکس جولائی 2023 سے 2026 تک بقایا جات سمیت ادا کیے جائیں گے اور پلاٹوں کا قبضہ ملنے تک ادائیگی جاری رہے گی۔
پروگرام ڈائریکٹر کے ساتھ میٹنگ میں پلاٹوں کی حوالگی کی ٹائم لائن طے کی جائے گی۔
گجر نالہ کے گھروں اور سڑک کے درمیان علیحدگی کی دیوار تعمیر نہیں کی جائے گی۔
کراچی بچاؤ تحریک کے رہنماؤں نے خبردار کیا کہ اگر وعدوں پر عملدرآمد نہ کیا گیا تو احتجاج کا دائرہ وسیع کیا جائے گا۔ متاثرین نے مطالبہ کیا کہ سپریم کورٹ کے احکامات کی روشنی میں شفاف اور فوری اقدامات کیے جائیں تاکہ بے گھر خاندانوں کو جلد از جلد بحال کیا جا سکے۔