کراچی (اسٹاف رپورٹر) — ایسٹ زون، اسٹیل ٹاؤن پولیس نے خفیہ اطلاعات پر بروقت کارروائی کرتے ہوئے اسٹریٹ کرائمز میں ملوث ڈکیت گینگ کو گرفتار کر لیا۔
ٹارگٹڈ کارروائی کے دوران پولیس نے ڈکیتی اور لوٹ مار میں ملوث 5 ملزمان کو حراست میں لیا۔ گرفتار شدگان کی شناخت عبدالجبار، قادر بخش، علی نواز، سمیر اور اسد کے ناموں سے ہوئی ہے۔
پولیس کے مطابق کارروائی کے دوران ملزمان کے قبضے سے 3 پسٹلز بمعہ ایمونیشن، 1 گاڑی اور نقد رقم برآمد ہوئی۔ برآمدہ گاڑی کو ضابطے کے مطابق تحویل میں لے لیا گیا ہے۔
ایس ایچ او اسٹیل ٹاؤن اور متعلقہ پولیس ٹیمز نے مشترکہ چھاپے مار کارروائی کے دوران مختلف علاقوں میں جرائم پیشہ عناصر کے خلاف کارروائی کی۔ پولیس کے مطابق گرفتار ملزمان کراچی کے مختلف علاقوں میں اسٹریٹ کرائمز کی متعدد وارداتوں میں ملوث رہے ہیں اور ان کا مزید کرمنل ریکارڈ چیک کیا جا رہا ہے۔
پولیس نے ملزمان کے خلاف مقدمات درج کر کے مزید تفتیش کا آغاز کر دیا ہے تاکہ دیگر سہولت کاروں اور ممکنہ نیٹ ورک تک پہنچا جا سکے۔