ڈیرہ اسماعیل خان میں شادی کی ایک تقریب کے دوران ہونے والے خودکش حملے کی سی سی ٹی وی فوٹیج منظرِ عام پر آ گئی ہے، جس میں حملہ آور کی نقل و حرکت دیکھی جا سکتی ہے۔ ذرائع کے مطابق خودکش بمبار کی شناخت 21 سالہ عبدالرحمن کے نام سے ہوئی ہے، جو افغان شہری اور دہشت گرد نکلا۔
کمانڈر فور کور لیفٹیننٹ جنرل فیاض حسین شاہ کا لاہور گیریژن میں ڈرون ٹریننگ فیسیلٹی کا دورہ
فوٹیج کے مطابق خودکش بمبار سفید چادر اوڑھے شادی کے پنڈال میں داخل ہوا۔ قبائلی رقص کے دوران وہ اچانک پنڈال سے نکل کر عقب میں واقع ایک کمرے کی طرف گیا، جہاں علاقے کے معززین موجود تھے۔ ذرائع کے مطابق بمبار نے کمرے میں داخل ہوتے ہی خود کو دھماکے سے اڑا لیا، جس کے نتیجے میں کمرے کی چھت منہدم ہو گئی۔
حملے میں خودکش بمبار کے علاوہ پانچ افراد جاں بحق ہوئے۔ ذرائع کا کہنا ہے کہ یہ خودکش حملہ امن کمیٹی کے سربراہ نور عالم محسود کے بھتیجے کی شادی کی تقریب میں کیا گیا۔
ماہرین کے مطابق پاکستان میں سیکیورٹی فورسز کی جانب سے مؤثر انٹیلی جنس بیسڈ آپریشنز کے باعث دہشت گرد اب براہِ راست فورسز کا سامنا کرنے کی صلاحیت کھو چکے ہیں، اسی لیے وہ عوامی اجتماعات، مذہبی تقریبات اور نہتے شہریوں کو سافٹ ٹارگٹس کے طور پر نشانہ بنا رہے ہیں تاکہ خوف و ہراس پھیلایا جا سکے۔
ماہرین کا مزید کہنا ہے کہ افغانستان اس وقت دہشت گردی کے لیے بیس آف آپریشن کے طور پر استعمال ہو رہا ہے، جہاں سے افغان دہشت گرد پاکستان میں ہائرڈ گنز کے طور پر کارروائیاں کر رہے ہیں۔ دہشت گردی میں افغان باشندوں کی شمولیت اس بات کا واضح ثبوت ہے کہ افغان طالبان رجیم دہشت گرد نیٹ ورکس کو ریاستی سطح پر سرپرستی اور سہولت فراہم کر رہی ہے۔
تجزیہ کاروں کے مطابق افغان طالبان کی منظم سرپرستی میں فتنہ الخوارج کی دہشت گردی اور خودکش حملے پورے خطے کے لیے ناسور بن چکے ہیں، جن کا بروقت اور فیصلہ کن خاتمہ ناگزیر ہو چکا ہے۔