راولپنڈی: چیف آف ڈیفنس فورسز فیلڈ مارشل سید عاصم منیر سے بنگلا دیش فضائیہ کے سربراہ ائیر چیف مارشل حسن محمود خان نے ملاقات کی، جس میں دوطرفہ دفاعی تعلقات اور خطے کی مجموعی سلامتی کی صورتحال پر تفصیلی تبادلہ خیال کیا گیا۔
میری ٹائم سیکٹر میں تاریخی پیش رفت، پاکستان سے پہلی نجی فیری سروس کی سافٹ لانچنگ
پاک فوج کے شعبہ تعلقات عامہ (آئی ایس پی آر) کے مطابق یہ ملاقات جمعرات کے روز منعقد ہوئی، جس دوران پاکستان اور بنگلا دیش کے درمیان دفاعی تعاون کو مزید فروغ دینے پر اتفاق کیا گیا۔ ملاقات میں پیشہ ورانہ عسکری روابط، مشترکہ تربیتی سرگرمیوں اور تربیتی تبادلوں کے دائرہ کار کو وسعت دینے پر زور دیا گیا۔
آئی ایس پی آر کے مطابق بنگلا دیشی ائیر چیف نے پاک فوج کی اعلیٰ پیشہ ورانہ صلاحیتوں کو خراجِ تحسین پیش کیا اور خطے میں امن و استحکام کے لیے پاکستان کے مثبت کردار کو سراہا۔
فیلڈ مارشل سید عاصم منیر نے اس موقع پر بنگلا دیش کے ساتھ مضبوط، دیرپا اور برادرانہ دفاعی تعلقات کے عزم کا اعادہ کیا۔ آئی ایس پی آر کے مطابق دونوں فریقین نے پاک بنگلا دیش تعلقات کو مزید مستحکم بنانے اور دفاعی شراکت داری کو نئی جہت دینے پر اتفاق کیا۔