کراچی کے علاقے تیموریہ میں اسٹریٹ کرائم کی واردات ناکام بنا دی گئی، جہاں ایک موٹر سائیکل پر سوار مسلح جوڑا نقدی اور موبائل فون چھیننے کی کوشش کر رہا تھا۔ ایس ایس پی سینٹرل ذیشان شفیق صدیقی کے مطابق واقعہ لنڈی کوتل چورنگی کے قریب پیش آیا، جب معید خان لاشاری فروٹ خریدنے کے لیے کھڑے تھے۔
ملزمان واردات کے بعد فرار ہونے لگے تو مدعی معید خان نے اپنی لائسنس یافتہ پستول سے فائرنگ کی، جس کے نتیجے میں مسلح ملزم رضوان ولد نامعلوم (تقریباً 30–32 سال) موقع پر ہلاک ہوگیا۔ اس کے ساتھ موجود خاتون ملزمہ شمع ولد ابراہیم زوجہ عبدالرحیم کو پولیس نے فوری گرفتار کرلیا۔
تیموریہ پولیس نے موقع پر پہنچ کر قانونی کارروائی کے لیے ہلاک شدہ ملزم کی لاش کو اسپتال منتقل کیا جبکہ گرفتار ملزمہ سے مزید تفتیش جاری ہے۔ ایس ایس پی سینٹرل نے بتایا کہ واقعے کے تمام پہلوؤں کا جائزہ لیا جا رہا ہے اور قانونی تقاضوں کے مطابق کارروائی عمل میں لائی جا رہی ہے۔
