متحدہ عرب امارات کے صدر شیخ محمد بن زاید النہیان کی پاکستان آمد پر شاندار اور تاریخی استقبال کیا گیا۔ پاکستانی فضائی حدود میں داخل ہوتے ہی پاک فضائیہ کے لڑاکا طیاروں نے معزز مہمان کے طیارے کو حصار میں لے کر فضائی سلامی پیش کی۔
مزارِ قائد کے اطراف سیوریج اوورفلو کا نوٹس دو افسران معطل
نور خان ایئر بیس پہنچنے پر وزیراعظم شہباز شریف، فیلڈ مارشل سید عاصم منیر اور وفاقی وزرا نے یو اے ای کے صدر کا پرتپاک استقبال کیا۔ اس موقع پر معزز مہمان کو 21 توپوں کی سلامی دی گئی جبکہ انہیں گارڈ آف آنر بھی پیش کیا گیا۔
ترجمان دفتر خارجہ کے مطابق یو اے ای کے صدر کے ہمراہ وزرا اور سینئر حکام پر مشتمل اعلیٰ سطحی وفد بھی پاکستان پہنچا ہے۔ دورے کے دوران پاکستان اور متحدہ عرب امارات کے درمیان دوطرفہ تعلقات، علاقائی صورتحال اور عالمی امور پر تفصیلی تبادلہ خیال کیا جائے گا۔
دفتر خارجہ کے ترجمان نے کہا کہ صدر یو اے ای کا دورہ پاکستان دونوں ممالک کے درمیان دیرینہ، برادرانہ اور مضبوط تعلقات کی عکاسی کرتا ہے۔ اس دورے سے تجارت، سرمایہ کاری، توانائی، ترقی اور علاقائی استحکام میں مزید فروغ متوقع ہے۔
یو اے ای کے صدر کی صدرِ مملکت آصف علی زرداری، وزیراعظم شہباز شریف اور دیگر اعلیٰ قیادت سے اہم ملاقاتیں شیڈول ہیں۔
صدر متحدہ عرب امارات کے دورۂ پاکستان کے پیش نظر وفاقی دارالحکومت اسلام آباد میں عام تعطیل کا اعلان کیا گیا ہے۔ اسلام آباد ہائیکورٹ کے نوٹیفکیشن کے مطابق اسلام آباد ہائیکورٹ اور ڈسٹرکٹ کورٹس 26 دسمبر کو بند رہیں گی۔