بیک اپ گول کیپر ماتوی سیفونوف نے شاندار کارکردگی کا مظاہرہ کرتے ہوئے چار پنالٹیز بچائیں، جس کے نتیجے میں پیرس سینٹ جرمین (PSG) نے قطر میں کھیلے گئے فیفا انٹر کانٹینینٹل کپ کے فائنل میں برازیل کے فلیمینگو کو پنالٹی شوٹ آؤٹ میں 2-1 سے شکست دے کر ٹائٹل اپنے نام کر لیا۔
وزیراعظم کی زیرِ صدارت حلال گوشت کی برآمدی پالیسی منظور جامع حکمتِ عملی تیار کرنے کی ہدایت
میچ مقررہ وقت اور اضافی وقت کے بعد 1-1 سے برابر رہا۔ پی ایس جی کی جانب سے خویچا کواراتسخیلیا نے برتری دلائی، تاہم فلیمینگو کے لیے جارجینہو نے پنالٹی پر گول کر کے مقابلہ برابر کر دیا۔
کوپا لیبرٹادورس کے چیمپئن فلیمینگو نے اس سے قبل میکسیکو کے کروز ازول اور افریقی چیمپئنز اہرام کو شکست دے کر فائنل تک رسائی حاصل کی تھی اور فائنل میں یورپی چیمپئنز کو سخت مقابلہ دیا۔ تاہم فیصلہ کن مرحلے پر پی ایس جی کو ماتوی سیفونوف کی شاندار گول کیپنگ نے کامیابی دلائی۔
پی ایس جی نے نویں منٹ میں فابین روئز کے ذریعے گول کیا، مگر وی اے آر کے فیصلے پر اسے مسترد کر دیا گیا۔ بعد ازاں ہاف ٹائم سے قبل فلیمینگو کے گول کیپر اگسٹن روسی کی ایک اور غلطی پر کواراتسخیلیا نے آسان گول کر کے پی ایس جی کو برتری دلا دی۔
فلیمینگو کو میچ میں واپسی کا موقع اس وقت ملا جب وی اے آر ریویو کے بعد پنالٹی دی گئی، جسے جارجینہو نے کامیابی سے گول میں تبدیل کیا۔ اضافی وقت میں دونوں ٹیموں کو مواقع ملے مگر کوئی فیصلہ کن گول نہ ہو سکا۔
پنالٹی شوٹ آؤٹ میں ماتوی سیفونوف نے غیرمعمولی مہارت کا مظاہرہ کرتے ہوئے پی ایس جی کو فتح دلوائی۔ میچ کے بعد کوچ لوئس اینریک نے کہا کہ یہ سیزن پی ایس جی کے لیے ناقابلِ فراموش ہے اور ٹیم جیتتے رہنے اور تاریخ رقم کرنے کے عزم پر قائم ہے۔