ٹرمپ کا بی بی سی کے خلاف مقدمہ، کیپیٹل ہِل حملے سے قبل تقریر ایڈٹ کرنے کا الزام

امریکی صدر ڈونلڈ ٹرمپ نے برطانوی نشریاتی ادارے بی بی سی کے خلاف وفاقی عدالت میں مقدمہ دائر کر دیا ہے، جس میں الزام عائد کیا گیا ہے کہ 6 جنوری 2021ء کو کیپیٹل ہِل پر حملے سے قبل کی گئی ان کی تقریر کو ایڈٹ کر کے نشر کیا گیا، جس کے باعث ناظرین گمراہ ہوئے۔

ڈاکٹر وردا مشتاق قتل کیس تین ملزمان نے الزامات مسترد کر دیے ایک کا اعترافی بیان ریکارڈ

ذرائع کے مطابق یہ مقدمہ امریکی ریاست فلوریڈا کی وفاقی عدالت میں دائر کیا گیا ہے۔ ڈونلڈ ٹرمپ کا مؤقف ہے کہ بی بی سی کے ایک دستاویزی پروگرام میں ان کی تقریر کے بعض حصوں میں ترمیم کر کے یہ تاثر دیا گیا کہ انہوں نے تشدد کی حوصلہ افزائی کی، حالانکہ وہ اس الزام کی مسلسل تردید کرتے رہے ہیں۔

ٹرمپ کے مطابق پروگرام میں ان کے الفاظ ’’دارالحکومت کی جانب مارچ‘‘ اور ’’فائٹ لائیک ہیل‘‘ شامل کیے گئے، تاہم وہ حصہ حذف کر دیا گیا جس میں انہوں نے پُرامن احتجاج پر زور دیا تھا۔ ان کا کہنا ہے کہ تقریر کے انتخابی حصوں کی اس ایڈیٹنگ نے ان کے مؤقف کو مسخ کر کے پیش کیا۔

پس منظر:
یہ تنازع بی بی سی کے پینوراما پروگرام سے متعلق ہے جو 2024ء کے امریکی صدارتی انتخابات سے قبل برطانیہ میں نشر ہوا تھا، تاہم یہ پروگرام امریکا میں نشر نہیں کیا گیا تھا۔ بعد ازاں بی بی سی نے اس معاملے پر معذرت کرتے ہوئے اعتراف کیا تھا کہ تقریر میں ترمیم کے باعث پرتشدد کارروائی کا غلط تاثر پیدا ہوا، اور اعلان کیا تھا کہ یہ پروگرام دوبارہ نشر نہیں کیا جائے گا۔

اس تنازع کے بعد ادارے کے ایڈیٹوریل معاملات پر شدید تنقید کی گئی، جبکہ جانبداری کے الزامات سامنے آنے پر اعلیٰ سطح پر تبدیلیاں بھی ہوئیں۔ بعد ازاں بی بی سی کے ڈائریکٹر جنرل اور چیف ایگزیکٹو برائے نیوز نے استعفیٰ دے دیا تھا، جن الزامات میں امریکی صدر کی تقریر کی مبینہ ایڈیٹنگ بھی شامل تھی۔