نیو کراچی انڈسٹریل ایریا تھانے کی حدود میں پولیس اور اسٹریٹ کرمنلز کے درمیان مقابلہ ہوا جس کے نتیجے میں ایک ملزم زخمی حالت میں گرفتار کرلیا گیا جبکہ دوسرا ملزم بغیر زخمی حراست میں لیا گیا۔
پولیس کے مطابق مقابلہ صدیق آباد قبرستان کمہار واڑہ کے قریب ہوا، جہاں فائرنگ کے تبادلے کے بعد زخمی حالت میں گرفتار ملزم کی شناخت خالد حسین کے نام سے کی گئی، جبکہ بلاضرب گرفتار ملزم کی شناخت محمد حسین کے نام سے ظاہر کی گئی ہے۔
گرفتار ملزمان کے قبضے سے ایک 30 بور پستول بمعہ لوڈ میگزین، راؤنڈز اور موٹر سائیکل بھی برآمد کی گئی ہے۔ زخمی ملزم کو طبی امداد کے لیے فوری طور پر قریبی اسپتال منتقل کردیا گیا۔
پولیس کا کہنا ہے کہ گرفتار ملزمان کے مجرمانہ ریکارڈ کی جانچ پڑتال جاری ہے جبکہ ضابطے کی کارروائی مکمل کی جارہی ہے۔
ترجمان ایس ایس پی ڈسٹرکٹ سینٹرل ذیشان شفیق صدیقی PPM, PSP نے واقعے کی تصدیق کی ہے۔
