لاہور (اسپورٹس ڈیسک) — انٹرنیشنل ہاکی فیڈریشن (ایف آئی ایچ) نے پاکستان ہاکی فیڈریشن (پی ایچ ایف) کو خط لکھ کر جونیئر ہاکی ورلڈکپ 2025 میں شرکت کی دعوت دے دی۔
تفصیلات کے مطابق ایف آئی ایچ نے خط میں کھلاڑیوں اور سپورٹ اسٹاف کی فہرستیں طلب کی ہیں۔ پی ایچ ایف نے اس پیش رفت سے حکومت پاکستان اور پاکستان اسپورٹس بورڈ کو آگاہ کردیا ہے۔
پاکستان ہاکی فیڈریشن کے صدر میر طارق بگٹی نے کہا کہ جونیئر ورلڈکپ میں شرکت کے حوالے سے حتمی فیصلہ حکومت پاکستان کی ہدایت پر ہوگا۔ ان کا مزید کہنا تھا کہ نیوٹرل وینیو پر میچز کرانے کا آپشن موجود ہے، لیکن جو بھی حکومتی فیصلہ ہوگا اسی کے مطابق ایف آئی ایچ سے بات کی جائے گی۔
واضح رہے کہ جونیئر ہاکی ورلڈکپ 28 نومبر سے 10 دسمبر تک بھارت کے شہروں چنائی اور مدورائی میں شیڈول ہے، جس میں دنیا بھر کی 24 ٹیمیں شرکت کریں گی۔