کوالالمپور (پ ر) — ملائیشیا میں مقیم پاکستانی بزنس کمیونٹی نے وزیراعظم پاکستان یوتھ پروگرام سندھ کے کوآرڈینیٹر فہد شفیق اور رکن سندھ اسمبلی سید شارق جمال کے اعزاز میں ایک پروقار عشائیہ دیا۔ تقریب کا اہتمام معروف بزنس مین شہنشاہ حسین نے "مسٹر کباب ریسٹورنٹ” میں کیا، جس میں پاکستانی بزنس کمیونٹی اور سماجی رہنماؤں کی بڑی تعداد شریک ہوئی۔
شرکاء میں عرفان احمد، آفتاب احمد، فرمان خان، ذیشان علی، محمد عدیل، محمد ساجد اور علی عباس سمیت اہم شخصیات شامل تھیں۔ اس موقع پر مقررین نے کہا کہ بیرون ملک منعقدہ ایسی تقریبات پاکستانی کمیونٹی کو ایک پلیٹ فارم پر جمع کرتی ہیں اور قومی یکجہتی کے فروغ میں اہم کردار ادا کرتی ہیں۔
ایم پی اے سید شارق جمال نے اپنے خطاب میں کہا کہ پاکستانی نوجوان دنیا بھر میں امن، بھائی چارے اور ترقی کا پیغام لے کر جا رہے ہیں، جو ملک کی مثبت سوچ کی بہترین عکاسی ہے۔ انہوں نے عشائیے کے شاندار انتظامات پر میزبان کو خراجِ تحسین پیش کیا۔
فہد شفیق نے کہا کہ نوجوانوں کو عالمی فورمز پر نمائندگی دینا پاکستان کے روشن مستقبل کی ضمانت ہے، ہمیں ہر شعبے میں اپنی صلاحیتوں کو اجاگر کرکے ملک کا نام روشن کرنا ہے۔
میزبان شہنشاہ حسین نے کہا کہ یہ تقریب نہ صرف پاکستان کے مثبت امیج کو اجاگر کرتی ہے بلکہ بزنس کمیونٹی اور نوجوان قیادت کو قریب لانے کا ذریعہ بھی ہے۔ انہوں نے اس موقع پر کراچی کے معروف بزنس مین اور بی جی سی گروپ کے چیف ایگزیکٹو سید امتیاز الحق بخاری کا خصوصی شکریہ ادا کیا۔
تقریب کے اختتام پر گروپ فوٹو لیا گیا، جس میں تمام شرکاء نے پاکستان کی ترقی اور خوشحالی کے لیے عزم کا اظہار کیا۔