سندھ حکومت کا بڑا فیصلہ: بھاری گاڑیوں میں جدید حفاظتی نظام لازمی، پرانی گاڑیوں پر پابندی

کراچی (اسٹاف رپورٹر) — سندھ حکومت نے عوامی تحفظ اور ٹریفک نظام کی بہتری کے لیے سندھ موٹر وہیکل رولز 1969 میں اہم ترامیم کر کے باضابطہ نوٹیفکیشن جاری کردیا ہے۔

سندھ پولیس گیمز 2025، 19 سے 22 نومبر کراچی میں منعقد ہوں گے

صوبائی وزیر ٹرانسپورٹ شرجیل انعام میمن کے مطابق نئی ترامیم کے تحت اب تمام بھاری کمرشل گاڑیوں کے مالکان کو محکمہ ٹرانسپورٹ کے قائم کردہ مراکز سے فٹنس سرٹیفکیٹ لینا لازمی ہوگا۔

مزید برآں:

• 20 سال سے زائد پرانی گاڑیاں انٹر پروونشل روٹس پر نہیں چل سکیں گی۔

• 25 سال سے زائد پرانی گاڑیاں انٹر سٹی روٹس پر بند ہوں گی۔

• شہروں کے اندر 35 سال سے زائد پرانی گاڑیوں کی اجازت نہیں ہوگی۔

ہر بھاری گاڑی میں درج ذیل حفاظتی آلات کی تنصیب لازمی قرار دی گئی ہے:

• جی پی ایس ٹریکنگ ڈیوائس

• ہائی ڈیفینیشن کیمرے

• ڈرائیور مانیٹرنگ کیمرا

• 360 ڈگری کیمرا سسٹم

• انڈر رن پروٹیکشن گارڈز

یہ تمام آلات فعال حالت میں ہونا ضروری ہیں، بصورت دیگر نہ گاڑی کی رجسٹریشن ہوگی، نہ فٹنس سرٹیفکیٹ اور نہ ہی پرمٹ جاری ہوگا۔

قانون کی خلاف ورزی پر جرمانے کی سزائیں بھی مقرر کی گئی ہیں:

• پہلی بار: معمولی جرمانہ

• دوسری بار: دو لاکھ روپے

• تیسری بار: تین لاکھ روپے

• بار بار خلاف ورزی یا خامیاں دور نہ کرنے پر گاڑی کی رجسٹریشن مستقل طور پر منسوخ کر دی جائے گی۔

شرجیل انعام میمن نے کہا کہ یہ اقدامات عوام کے جان و مال کے تحفظ اور حادثات کی روک تھام کے لیے کیے گئے ہیں۔ ٹریفک پولیس، ایکسائز پولیس اور ٹرانسپورٹ اتھارٹیز کو سختی سے ہدایت دی گئی ہے کہ قوانین کے نفاذ میں کسی قسم کی رعایت نہ برتی جائے۔

ان کے مطابق، جدید حفاظتی نظام نہ صرف حادثات کی وجوہات کو کم کرے گا بلکہ تحقیقات کو بھی زیادہ شفاف اور مؤثر بنانے میں مددگار ہوگا۔