بھارت کی اپوزیشن کے رہنما راہول گاندھی نے الزام لگایا ہے کہ الیکشن کمیشن آف انڈیا (ای سی آئی) نے ووٹر فہرست میں مبینہ بڑی ہیرا پھیری کی تحقیقات روک دی ہیں، جو ادارے کی ساکھ اور آزادی پر براہِ راست حملہ ہے۔
امریکا نے چاہ بہار بندرگاہ پر استثنیٰ ختم کر دیا بھارت بھی اثر کی زد میں
اپوزیشن اور ناقدین کا مؤقف ہے کہ دنیا کی سب سے بڑی جمہوریت میں انتخابی فہرستوں کے ذریعے ووٹنگ کے عمل کو متاثر کیا جا رہا ہے، تاہم ای سی آئی نے ان الزامات کو مسترد کر دیا ہے۔
55 سالہ کانگریس رہنما راہول گاندھی نے دعویٰ کیا کہ ای سی آئی نے وہ اہم ڈیٹا روک رکھا ہے جس سے مبینہ ہیرا پھیری میں ملوث افراد کی نشاندہی ہو سکتی تھی۔ ان کے مطابق ای سی آئی کے سربراہ گیانیش کمار "آئین کو نقصان پہنچانے والوں” کو تحفظ فراہم کر رہے ہیں۔
ای سی آئی نے ان الزامات کو بے بنیاد قرار دیتے ہوئے کہا کہ اس نے خود پولیس میں شکایت درج کرائی ہے کہ ووٹر فہرست سے نام نکالنے کی کچھ ناکام کوششیں ہوئیں۔
راہول گاندھی نے مزید کہا کہ ان کے پاس "سو فیصد شواہد” موجود ہیں کہ کرناٹک میں خودکار سافٹ ویئر کے ذریعے ہزاروں ووٹرز کو فہرست سے ہٹانے کی کوشش کی گئی۔ ان کے مطابق تحقیقات کرنے والے اداروں کو مطلوبہ تکنیکی ڈیٹا فراہم کرنے سے انکار کیا گیا، حالانکہ یہ کارروائیاں کانگریس کے مضبوط علاقوں کو نشانہ بنا رہی تھیں۔
انہوں نے دعویٰ کیا کہ کرناٹک کی کرمنل انویسٹی گیشن ڈپارٹمنٹ نے 18 ماہ کے دوران ای سی آئی سے 18 بار ڈیٹا طلب کیا، لیکن اسے فراہم نہیں کیا گیا۔
یہ تنازع ایسے وقت میں سامنے آیا ہے جب بھارت کی تیسری بڑی ریاست بہار، جہاں 13 کروڑ سے زائد آبادی رہتی ہے، میں اکتوبر یا نومبر میں انتخابات متوقع ہیں۔ اپوزیشن کے مطابق ای سی آئی نے ریاستی ووٹرز کو اپنی شہریت ثابت کرنے کے لیے محض چند ہفتے دیے اور ایسے کاغذات طلب کیے جو عوام کی بڑی تعداد کے پاس موجود نہیں، جس سے لاکھوں افراد انتخابی عمل سے محروم ہو سکتے ہیں۔