کراچی (کورٹ رپورٹر) — قیوم آباد میں کمسن بچیوں سے زیادتی کے کیس میں متاثرہ چار بچیوں نے عدالت میں اپنا بیان قلم بند کرادیا۔
خضدار: سیکیورٹی فورسز کا آپریشن، بھارتی پراکسی فتنہ الخوارج کے 4 دہشت گرد ہلاک
جوڈیشل مجسٹریٹ جنوبی کی عدالت میں سماعت کے دوران بچیوں نے ملزم شبیر احمد کو عدالت کے روبرو شناخت کرتے ہوئے کہا کہ "یہی وہ شخص ہے جس نے ہمارے ساتھ زیادتی کی۔” بچیوں کے 164 کے بیانات جج کے سامنے قلم بند کیے گئے۔
پولیس نے عدالت کو بتایا کہ ملزم 2016 سے کمسن بچوں اور بچیوں کو زیادتی کا نشانہ بنا رہا تھا اور اس دوران ویڈیوز بھی بناتا رہا۔ ملزم کے خلاف تھانہ ڈیفنس میں متعدد مقدمات درج ہیں جبکہ اب تک 7 مقدمات رجسٹرڈ ہوچکے ہیں۔
ادھر پولیس کی جانب سے عدالت میں ایک درخواست دائر کی گئی ہے جس میں کہا گیا ہے کہ ملزم شبیر احمد اعتراف جرم کرنا چاہتا ہے۔ ملزم اس وقت جسمانی ریمانڈ پر پولیس کی تحویل میں ہے۔
پولیس کے مطابق شبیر احمد کو اہل علاقہ کی شکایت پر گرفتار کیا گیا تھا، جبکہ تحقیقات میں مزید متاثرہ بچوں کے سامنے آنے کا بھی امکان ہے۔