اسلام آباد: وفاقی دارالحکومت اور راولپنڈی میں ڈینگی وائرس کے کیسز میں مسلسل اضافہ ہورہا ہے۔ گزشتہ 24 گھنٹوں کے دوران اسلام آباد میں مزید 24 افراد اور پنجاب میں 20 افراد میں ڈینگی وائرس کی تشخیص ہوئی۔
محکمہ صحت کے مطابق اسلام آباد کے دیہی اور شہری علاقوں سے 12،12 نئے کیس سامنے آئے جس کے بعد رواں سال مجموعی کیسز کی تعداد 554 تک جا پہنچی ہے۔ ان میں سے 417 مریض دیہی جبکہ 137 شہری علاقوں سے رپورٹ ہوئے۔
محکمہ صحت نے متاثرہ علاقوں کے 17 ہزار 176 گھروں میں اسپرے اور فوگنگ کی جبکہ رواں ماہ اب تک 12 ہزار 493 ڈینگی لاروا ہاٹ اسپاٹس کو ختم کیا جاچکا ہے۔
راولپنڈی میں رواں سال کے دوران ڈینگی کے 394 کیسز رپورٹ ہوئے ہیں، جن کا تعلق پوٹھوہار ٹاؤن کے 4 وارڈز اور راول ٹاؤن کی یونین کونسلز سے ہے۔