ابوجا (رائٹرز/مانیٹرنگ ڈیسک) نائیجیریا کی ریاست نائیجر میں کشتی الٹنے کے حادثے میں کم از کم 60 افراد جاں بحق ہوگئے جبکہ درجنوں مسافروں کو زندہ بچا لیا گیا۔ مقامی حکام کے مطابق کشتی میں 100 سے زائد افراد سوار تھے جو ایک تعزیتی دورے کے لیے جا رہے تھے۔
جناح ہاؤس کیس: علیمہ خان کے دوسرے بیٹے شیر شاہ کی ضمانت بھی منظور
رپورٹ کے مطابق یہ کشتی منگل کی صبح ضلع مالالے کے گاؤں تونگان سُولے سے روانہ ہوئی اور دُگّا کی جانب جا رہی تھی، تاہم گاوساوا کمیونٹی کے قریب پانی میں ڈوبے ہوئے درخت سے ٹکرا گئی جس کے بعد الٹ گئی۔
بورگو لوکل گورنمنٹ ایریا کے چیئرمین عبداللہ بابا آرا نے کہا کہ اب تک 60 ہلاکتوں کی تصدیق ہو چکی ہے، کئی افراد لاپتہ ہیں جبکہ 10 زخمیوں کی حالت تشویشناک ہے۔
شگومی کے ضلعی سربراہ سعدو انووا محمد کے مطابق حادثہ مقامی وقت کے مطابق صبح 11 بجے پیش آیا۔ وہ دوپہر 12 سے شام 4 بجے تک جائے حادثہ پر موجود رہے اور اس دوران 31 لاشیں نکالی گئیں۔ ان کے مطابق 4 جاں بحق افراد کی تدفین اسلامی رسومات کے مطابق فوری طور پر کر دی گئی۔ جاں بحق ہونے والوں میں خواتین اور بچے بھی بڑی تعداد میں شامل ہیں۔
نائیجر اسٹیٹ ایمرجنسی مینجمنٹ ایجنسی نے کہا ہے کہ امدادی ٹیمیں اور مقامی غوطہ خور لاپتہ افراد کی تلاش کر رہے ہیں۔ ایجنسی کے مطابق 29 ہلاکتوں اور 50 افراد کو زندہ بچانے کی تصدیق ہو چکی ہے جبکہ 2 افراد تاحال لاپتہ ہیں۔
حکام کے مطابق کشتی میں مسافروں کی تعداد مقررہ حد سے کہیں زیادہ تھی اور درخت سے ٹکرانے کے بعد حادثہ پیش آیا۔ نائیجیریا میں برسات کے موسم کے دوران کشتیوں کے الٹنے کے واقعات عام ہیں کیونکہ اکثر کشتیوں پر بوجھ زیادہ ڈالا جاتا ہے اور پرانی و خستہ کشتیوں کا استعمال کیا جاتا ہے، جب کہ حفاظتی قوانین پر عملدرآمد نہ ہونے کے برابر ہے۔