کراچی میں ڈمپر حادثات کے خلاف سندھ ہائیکورٹ میں درخواست، رجسٹریشن اور فٹنس ریکارڈ طلب کرنے کی استدعا

کراچی میں ڈمپر حادثات کے نتیجے میں بڑھتی ہوئی اموات کے خلاف سندھ ہائیکورٹ میں درخواست دائر کر دی گئی۔ درخواست تحریک بحالی کراچی کے اشرف جبار قریشی اور دیگر کی جانب سے دائر کی گئی ہے، جس میں چیف سیکرٹری سندھ، ہوم سیکرٹری، آئی جی سندھ اور دیگر حکام کو فریق بنایا گیا ہے۔

کراچی میں بے لگام ڈمپر کا قہر، سی ویو سے واپس آنے والے میاں بیوی جاں بحق

درخواست میں مؤقف اختیار کیا گیا ہے کہ ڈمپر ڈرائیورز کی اکثریت ٹریفک قوانین کی پابندی نہیں کرتی، جس کے باعث قیمتی انسانی جانیں ضائع ہو رہی ہیں۔ صرف رواں برس ہیوی ٹریفک کراچی میں 168 افراد کی جان لے چکا ہے۔

عدالت سے استدعا کی گئی ہے کہ ڈمپرز کی رجسٹریشن اور فٹنس سے متعلق مکمل ریکارڈ طلب کیا جائے، اور تمام فریقین کو سپریم کورٹ اور ہائیکورٹ کے جاری کردہ احکامات پر عملدرآمد یقینی بنانے کا حکم دیا جائے۔

یاد رہے کہ کراچی میں ڈمپر، ٹینکر اور ٹریلر سمیت ہیوی ٹریفک شہریوں کے لیے جان لیوا خطرہ بن چکا ہے، اور روزانہ کی بنیاد پر حادثات قیمتی جانیں نگل رہے ہیں۔