دریائے سوات میں سیلابی ریلے میں بہنے والے لاپتا افراد کی تلاش تیسرے روز بھی جاری ہے، اور ریسکیو حکام نے ایک اور نوجوان کی لاش نکال لی۔ اس کے ساتھ ہی اب تک ریلے سے نکالی گئی لاشوں کی تعداد 12 ہو گئی ہے۔
ریسکیو حکام کے مطابق، مردان سے تعلق رکھنے والے نوجوان دانیال کی لاش دریا سے نکالی گئی، جو اس حادثے کے بعد برآمد ہونے والی 12ویں لاش ہے۔ صوبائی ڈیزاسٹر مینجمنٹ اتھارٹی (پی ڈی ایم اے) کے اعداد و شمار کے مطابق، حالیہ شدید بارشوں، سیلاب اور لینڈ سلائیڈنگ کے باعث خیبر پختونخوا میں اب تک 19 افراد جاں بحق اور 6 افراد زخمی ہو چکے ہیں۔
ریسکیو 1122 کے ترجمان بلال فیضی کے مطابق، چارسدہ سے ایک بچے کی لاش بھی نکالی گئی، جسے اسپتال منتقل کر دیا گیا، اور اب اسے اس کے آبائی علاقے روانہ کیا جائے گا۔ بلال فیضی نے مزید کہا کہ ایک شخص اب بھی لاپتہ ہے، اور اس کی تلاش کا عمل جاری ہے۔
جمعہ کے روز، شدید بارشوں کی وجہ سے سوات اور ملاکنڈ ڈویژنز کے کئی علاقوں میں طوفانی سیلاب آیا، جس کے نتیجے میں 17 افراد لاپتہ ہو گئے تھے۔ ان میں سے 4 افراد کو زندہ بچا لیا گیا، جبکہ 11 لاشیں برآمد ہوئیں، اور اب 12ویں لاش بھی مل چکی ہے۔ اس وقت صرف ایک شخص لاپتہ ہے۔
علاوہ ازیں، دو روز قبل لوئر دیر میں سیلابی دریا میں ڈوبنے والے نوجوان کی لاش بھی چارسدہ سے برآمد ہوئی ہے۔ ریسکیو ٹیم گزشتہ 2 دن سے مسلسل تلاش کر رہی تھی، جس کے بعد یہ لاش برآمد ہوئی۔
مزید بارشوں اور سیلاب کا امکان
پی ڈی ایم اے کے مطابق، آئندہ 24 سے 48 گھنٹوں کے دوران خیبر پختونخوا کے بیشتر اضلاع میں مزید بارشوں کی پیشگوئی کی گئی ہے۔ سوات، چترال، ایبٹ آباد، مانسہرہ، پشاور، بنوں اور وزیرستان میں سیلاب کا خطرہ ظاہر کیا گیا ہے۔ دریائے سوات، دریائے پنجکوڑہ اور دیگر معاون ندی نالوں میں پانی کی سطح میں اضافے کا امکان ہے، جبکہ دریائے کابل میں نچلے درجے کا سیلاب بھی متوقع ہے۔
پی ڈی ایم اے نے مقامی انتظامیہ کو ہدایت کی ہے کہ وہ احتیاطی تدابیر اختیار کریں اور حساس مقامات پر ٹریفک کو کنٹرول کریں۔ عوام کو بھی ہدایات دی گئی ہیں کہ وہ ندی نالوں اور نکاسی آب کے نظام کی صفائی کو یقینی بنائیں اور آندھی، ژالہ باری اور گرج چمک کے دوران محفوظ مقامات پر پناہ لیں۔
کسانوں کو فصلیں جلد کاٹ کر محفوظ مقامات پر رکھنے اور مویشیوں کی حفاظت کے اقدامات کرنے کی ہدایت کی گئی ہے۔ پی ڈی ایم اے کا ایمرجنسی آپریشنز سینٹر مکمل طور پر فعال ہے، اور عوام سے درخواست کی گئی ہے کہ کسی بھی ہنگامی صورتحال کی اطلاع 1700 پر دیں۔