کراچی: شہر قائد میں ایک اور افسوسناک واقعہ، اتوار کی صبح شاہ لطیف ٹاؤن تھانے کی حدود میں واقع جام کنڈو چوک، کلہاڑی چوک کے قریب نامعلوم مسلح افراد کی فائرنگ سے ایک شخص جاں بحق ہو گیا۔ فائرنگ کے بعد جائے وقوعہ پر خوف و ہراس پھیل گیا۔
بھارت میں وقف ترمیمی بل کے خلاف شدید احتجاج، مسلمانوں کا آئینی حقوق کے تحفظ کا مطالبہ
تفصیلات کے مطابق مقتول کی شناخت 35 سالہ گل زیب ولد قادر بخش کے نام سے ہوئی ہے، جس کی لاش ایدھی ایمبولینس کے ذریعے جناح اسپتال منتقل کی گئی۔ مقتول کا تعلق خیبر پختونخوا سے بتایا جاتا ہے اور وہ کراچی میں ایک نجی کمپنی میں ملازمت کر رہا تھا۔
پولیس کے مطابق یہ واقعہ فجر کی نماز کے بعد پیش آیا، جب گل زیب پانی کی ٹینکی پر سو رہا تھا۔ اسی دوران نامعلوم مسلح ملزمان نے قریب آ کر اس کے سر پر فائر کیا، جو کہ جان لیوا ثابت ہوا اور وہ موقع پر ہی دم توڑ گیا۔
شاہ لطیف ٹاؤن تھانے کے ہیڈ محرر سلیم نے بتایا کہ واقعے کے بعد جائے وقوع سے شواہد اکٹھے کیے گئے ہیں جبکہ علاقے میں موجود عینی شاہدین کے بیانات بھی قلمبند کر لیے گئے ہیں۔ ابتدائی تفتیش کے مطابق واقعہ ذاتی دشمنی کا نتیجہ معلوم ہوتا ہے، تاہم پولیس تمام پہلوؤں پر تفتیش کر رہی ہے تاکہ اصل محرکات سامنے لائے جا سکیں۔
پولیس کا کہنا ہے کہ واقعے میں ملوث ملزمان کی تلاش کے لیے قریبی علاقوں کے سی سی ٹی وی کیمروں کی فوٹیج حاصل کی جا رہی ہے، اور جلد ہی واقعے کی تہہ تک پہنچنے کی کوشش کی جائے گی۔
شہریوں نے اس واقعے پر افسوس کا اظہار کرتے ہوئے متعلقہ حکام سے مطالبہ کیا ہے کہ ملزمان کو جلد از جلد گرفتار کر کے قانون کے کٹہرے میں لایا جائے تاکہ ایسے واقعات کا سدباب ممکن ہو سکے۔