سندھ بلڈنگ کنٹرول اتھارٹی (SBCA) نے شہر بھر میں غیرقانونی تعمیرات کے خلاف گھیرا مزید تنگ کر دیا ہے۔ ایس بی سی اے نے ڈسٹرکٹ سینٹرل سمیت کراچی کے مختلف علاقوں میں کارروائیاں کرتے ہوئے 18 ملزمان کو گرفتار کر لیا، جبکہ متعدد ایف آئی آرز درج کی گئی ہیں۔
تفصیلات کے مطابق، ڈیمالیشن اسکواڈ نے ہوٹل میٹروپول کراچی ساؤتھ کے گراؤنڈ فلور پر غیرقانونی شوروم کی تعمیر روک کر اسے سربمہر کر دیا۔
رواں سال کی کارکردگی رپورٹ کے مطابق، ایس بی سی اے نے 412 ریکارڈیڈ کارروائیاں کیں، جن کی تفصیل درج ذیل ہے:
-
ڈسٹرکٹ سینٹرل: 235 کارروائیاں
ایسٹ: 108
ساؤتھ: 46
کورنگی: 17
کیماڑی: 4
ویسٹ: 1
انڈسٹریل زون: 1
ایس بی سی اے کے ڈائریکٹر جنرل محمد اسحاق کھوڑو نے واضح کیا ہے کہ غیرقانونی تعمیرات کے خاتمے کے لیے زیرو ٹالرنس پالیسی پر سختی سے عمل کیا جا رہا ہے اور اس ضمن میں ٹھکیدار، سہولت کار اور پورشن مافیا کے خلاف مکمل قانونی کارروائی عمل میں لائی جائے گی۔
انہوں نے بتایا کہ عید کی تعطیلات کے دوران بھی عملہ متحرک رہا اور غیرقانونی سرگرمیوں کو موقع پر ناکام بنایا گیا۔ اس دوران ویجیلنس ٹیمیں اور ڈیمالیشن اسکواڈ مکمل طور پر فعال رہے۔
اس حوالے سے شہر کے ڈپٹی کمشنرز اور ایس ایس پیز سے بھی مسلسل مشاورت کی جا رہی ہے تاکہ غیرقانونی تعمیرات کے خاتمے کے لیے مربوط حکمت عملی پر عمل کیا جا سکے۔