صدر مملکت آصف علی زرداری کی طبیعت میں بہتری آ رہی ہے اور امکان ہے کہ انہیں جلد کراچی کے نجی اسپتال سے ڈسچارج کر دیا جائے گا۔ وہ بخار اور انفیکشن کے باعث اسپتال میں زیر علاج ہیں، تاہم طبیعت میں نمایاں بہتری کے بعد جلد صحت یاب ہونے کی امید ہے۔
جنوبی وزیرستان میں فرنٹیئر کور خیبرپختونخوا (ساؤتھ) کی جانب سے عیدالفطر کی رنگا رنگ تقریبات
اس سے قبل، سندھ کے صوبائی وزیر شرجیل میمن نے صدر زرداری کے علاج کے لیے دبئی منتقلی کی خبروں کو بے بنیاد قرار دیا تھا۔ ان کا کہنا تھا کہ صدر کی صحت میں بہتری آ رہی ہے اور انشاءاللہ وہ جلد مکمل صحت یاب ہو جائیں گے۔
واضح رہے کہ صدر مملکت کی علالت کے باعث انہیں کراچی کے کلفٹن میں واقع ایک نجی اسپتال میں داخل کیا گیا تھا۔ اسپتال ذرائع کے مطابق، وہ بخار میں مبتلا ہیں، جبکہ اسپتال کے اطراف سیکیورٹی کے سخت انتظامات کیے گئے ہیں اور پولیس کی بھاری نفری تعینات ہے۔
وزیراعظم شہباز شریف نے صدر آصف زرداری سے رابطہ کرکے ان کی خیریت دریافت کی اور دعا کی کہ اللہ تعالیٰ انہیں جلد صحت کاملہ عطا فرمائے۔ وزیراعظم نے کہا کہ پوری قوم کی دعائیں صدر مملکت کے ساتھ ہیں۔