کراچی: سی ای او واٹر کارپوریشن انجینئر سید صلاح الدین احمد نے کہا ہے کہ واٹر کارپوریشن کی آمدنی میں مزید اضافے کے لیے بھرپور اقدامات کیے جائیں گے۔ اس ضمن میں ادائیگیاں نہ کرنے والے صارفین کو شوکاز نوٹس جاری کیے جائیں گے اور گھر گھر بلز پہنچانے کے لیے حکمت عملی اپنائی جائے گی۔ مزید برآں، ریبیٹ پالیسی کے تحت صارفین سے زیادہ سے زیادہ واجبات وصول کیے جائیں گے تاکہ ادارے کو خوشحال بنانے کے لیے اس کی آمدنی میں اضافہ کیا جا سکے۔
ان خیالات کا اظہار انہوں نے ریکوری اینڈ ریسورس جنریشن (آر آر جی) ڈپارٹمنٹ واٹر کارپوریشن کے اعلیٰ افسران سے ایم ڈی سیکریٹریٹ کارساز میں منعقدہ اجلاس کی صدارت کرتے ہوئے کیا۔ اس موقع پر ریٹیل کے تمام ڈائریکٹرز اور ڈپٹی ڈائریکٹرز بھی موجود تھے۔ سی ای او نے افسران کو سخت احکامات دیتے ہوئے کہا کہ واٹر کارپوریشن کے مختلف اداروں پر پانی کے بلوں کی مد میں 52 ارب روپے سے زائد کے واجبات ہیں جو 2016 سے ابھی تک واٹر کارپوریشن کو ادا نہیں کیے گئے۔ انہیں ہر صورت میں جلد از جلد وصول کرنا ضروری ہے، کیونکہ یہ رقم واٹر کارپوریشن کی ملکیت ہے۔
ان کا کہنا تھا کہ ادارے کی آمدنی بڑھانے سے ادارہ خوشحال ہوگا، اور اگر ادارہ خوشحال ہوگا تو ملازمین بھی خوشحال ہوں گے۔ انہوں نے مزید کہا کہ نئے ایکٹ کے تحت اور بورڈ آف ڈائریکٹرز کی منظوری سے ادارے کی بہتری کے لیے اقدامات کیے جا رہے ہیں جس کا مقصد واٹر کارپوریشن کی ماہانہ آمدنی میں اضافہ کرنا ہے۔
سی ای او نے کہا کہ ہمیں ادارے کو مل کر ٹھیک کرنا ہے اور واٹر کارپوریشن کو ایک مثالی ادارہ بنانا ہے، کیونکہ ہمارا ادارہ عوامی خدمت کے لیے ہے اور شہریوں کو فراہمی و نکاسی آب کی بہترین سہولت فراہم کرنا ہماری اولین ترجیح ہے۔