کراچی (اسٹاف رپورٹر) وزیر بلدیات سندھ سعید غنی نے پاکستان پیپلز پارٹی کے 57 ویں یوم تاسیس کے موقع پر ہونے والے عظیم الشان جلسے کی تیاریوں کا اعلان کیا ہے۔ جمعہ کے روز ریلوے گراؤنڈ، کالا پل پر پریس کانفرنس سے خطاب کرتے ہوئے سعید غنی نے کہا کہ پیپلز پارٹی کسی سیاسی جماعت پر پابندی کے حق میں نہیں ہے، لیکن پرامن احتجاج کے دوران انتشار یا دہشت گردی کو روکنا ضروری ہے۔
آرمی چیف جنرل عاصم منیر کا نیشنل کاؤنٹر ٹیررازم سینٹر پبی کا دورہ
انہوں نے کہا کہ پیپلز پارٹی نے 1967 سے لے کر آج تک ملک میں جتنی مشکلات کا سامنا کیا ہے، وہ کسی اور سیاسی جماعت کے حصے میں نہیں آئیں۔ سعید غنی نے پیپلز پارٹی کی جدوجہد کو سراہتے ہوئے کہا کہ یہ واحد سیاسی جماعت ہے جس کی جڑیں عوام کے دلوں میں گہری ہیں اور پارٹی اپنے 57 سالوں میں بے شمار ترقیاتی اور تاریخی کاموں کا حصہ بنی ہے۔
انہوں نے مزید کہا کہ پارٹی کا یوم تاسیس 30 نومبر کو کراچی کے ریلوے گراؤنڈ میں منایا جائے گا جہاں مرکزی قیادت، بشمول چیئرمین بلاول بھٹو زرداری، ویڈیو لنک پر خطاب کریں گے اور جلسے میں آتشبازی اور میوزیکل پروگرام کا انعقاد کیا جائے گا۔
سعید غنی نے کہا کہ پیپلز پارٹی نے عوام کی طاقت کو اجاگر کیا اور جاگیرداروں، وڈیروں اور مخدوموں کی سیاست کا خاتمہ کیا۔