تشکر نیوز: کراچی میں یورپی یونین اور یورپین انویسٹمنٹ بینک کے اعلیٰ سطحی وفد نے واٹر کارپوریشن کے مرکزی دفتر کارساز کا دورہ کیا اور سی ای او واٹر کارپوریشن انجینئر سید صلاح الدین احمد سے ملاقات کی۔ وفد کی قیادت ایڈورڈاس بمسٹیناس کر رہے تھے، جو ایشیا، وسطی ایشیا اور بحر الکاہل کے ڈویژن کے سربراہ ہیں۔ ملاقات میں لون آفیسر مارکو ایرینا، یورپی یونین کے تعاون کے سربراہ جیروئن ولیمز، اور عالمی بینک کے نمائندگان بھی شامل تھے۔
سی ای او واٹر کارپوریشن نے وفد کو حالیہ اصلاحات اور پائیدار ترقی کے اہداف (SDGs) کے روڈ میپ کے بارے میں آگاہ کیا، خاص طور پر SDGs کے گول 6 میں اہداف حاصل کرنے پر روشنی ڈالی۔ حکام نے یورپی انویسٹمنٹ بینک کو بتایا کہ کراچی میں پانی اور سیوریج کے بنیادی ڈھانچے کو بہتر بنانے کے لیے 4 بلین امریکی ڈالر کی سرمایہ کاری کی ضرورت ہے۔
وفد نے واٹر کارپوریشن کے مختلف منصوبوں میں گہری دلچسپی کا اظہار کیا اور اس کے جامع اور کثیر شعبہ جاتی پائیدار ترقی کے اہداف کے روڈ میپ کی تعریف کی۔ انہوں نے واٹر فلٹریشن پلانٹس، قابل تجدید توانائی، ویسٹ واٹر ٹریٹمنٹ پلانٹس، اور ری سائیکلنگ جیسے منصوبوں کی تفصیلی فزیبلٹی اسٹڈیز کے لیے اپنی حمایت کا یقین دلایا۔
یہ پہلا موقع تھا کہ یورپی انویسٹمنٹ بینک نے کسی پاکستانی یوٹیلٹی آرگنائزیشن کے ساتھ سرمایہ کاری کے مقاصد کے لیے رابطہ کیا ہے، جو واٹر کارپوریشن کے لیے ایک بڑا اعزاز ہے۔ واٹر کارپوریشن کے جدید ترین ہائیڈرنٹ مینجمنٹ اینڈ مانیٹرنگ سینٹر کے دورے کے دوران، وفد نے کراچی کے جیو پولیٹیکل چیلنجز کے باوجود انتظامیہ کی کوششوں کو سراہا۔
ملاقات میں اس بات پر بھی زور دیا گیا کہ یورپی انویسٹمنٹ بینک واٹر کارپوریشن کے نان ریونیو واٹر کو کم کرنے اور عملے کی استعداد کار بڑھانے کے لیے تکنیکی مدد فراہم کر سکتا ہے۔ وفد نے اس عزم کا اظہار کیا کہ واٹر کارپوریشن کے امکانات کو دیکھتے ہوئے مستقبل میں مزید قابل عمل منصوبے شروع کیے جا سکتے ہیں۔