گورنر سندھ نہال ہاشمی کی سابق گورنر پر تنقید، خدمت سندھ ایپ لانچ

گورنر سندھ نہال ہاشمی نے سابق گورنر پر تنقید کرتے ہوئے کہا ہے کہ انہوں نے گورنر ہاؤس میں بادشاہت کا نظام قائم کر رکھا تھا۔ وہ سابق گورنر کی طرح ریاکار نہیں جو گورنر ہاؤس کے باہر امید کی گھنٹی لگائیں۔

گورنر سندھ نے کہا کہ وہ شہنشاہ نہیں بلکہ عوامی گورنر ہیں۔ وہ جو کام کرتے ہیں، دکھاوے کے لیے نہیں کرتے۔

وہ گورنر ہاؤس میں خدمت سندھ موبائل ایپ کی افتتاحی تقریب سے خطاب کر رہے تھے۔

65 سرکاری ادارے ایپ سے منسلک

نہال ہاشمی نے کہا کہ آج عوام کو سہولت فراہم کرنے کے لیے یہ اقدام کیا گیا ہے۔ صوبے کے شہریوں کی شکایات دور کرنے کا عمل شروع کر دیا گیا ہے۔

ان کے مطابق شہری کہتے ہیں کہ ان کی بات سنی جائے۔ اس مقصد کے لیے ایپ کو ایک پل کے طور پر استعمال کیا جائے گا۔ اس کے ذریعے عوام کے مسائل حل کرنے کی کوشش ہوگی۔

انہوں نے بتایا کہ اس ایپ سے 65 ادارے منسلک ہو رہے ہیں۔ یہ کسی کو نیچا یا اونچا دکھانے کے لیے نہیں، بلکہ عوامی خدمت کے لیے ہے۔

گورنر سندھ نے کہا کہ پاکستان ووٹ کی طاقت سے وجود میں آیا۔ بابائے قوم قائداعظم محمد علی جناح نے ملک کے قیام کے لیے اپنی بیماری بھی چھپائی۔

ان کے بقول قائداعظم پاکستان بننے کے بعد صرف ایک سال زندہ رہے تاکہ آنے والی نسلیں ہزاروں سال جی سکیں۔ انہوں نے کہا کہ مسلم لیگ کی تاریخ میں مذہب یا لسانیت کی بنیاد پر سیاست کا ذکر نہیں ملتا۔

نہال ہاشمی نے اعلان کیا کہ اس سال قائداعظم کی 150ویں سالگرہ شایانِ شان طریقے سے منائی جائے گی۔ اس موقع پر ان کی شخصیت اور خدمات کو اجاگر کیا جائے گا۔

شکایات کا ڈیٹا میڈیا سے بھی شیئر ہوگا

گورنر سندھ نے کہا کہ بیرونی سرمایہ کاری تو آ سکتی ہے، لیکن اپنے نظام کو خود بہتر بنانا ہوگا۔ انہوں نے کہا کہ نواز شریف کے فالوورز کا بانی تحریک انصاف سے کوئی موازنہ نہیں۔

ان کے مطابق ایپ کی کامیابی میں متعلقہ افراد کا کردار اہم ہوگا۔ ہر شکایت کا ڈیٹا جمع کرکے میڈیا کے حوالے بھی کیا جائے گا۔

انہوں نے نادرا کی خدمات کو حساس قرار دیا۔ ان کا کہنا تھا کہ شناختی کارڈ سمیت دیگر دستاویزات نادرا ہی کے ذریعے بننی چاہییں۔ ادارے کو یہ بھی یقینی بنانا ہوتا ہے کہ کوئی بے ضابطگی نہ ہو۔

اسٹریٹ کرائم کے اسباب پر گورنر کا مؤقف

نہال ہاشمی نے کہا کہ موبائل فون چھیننے کے کئی اسباب ہیں۔ معاشی ناہمواری بھی جرائم کی ایک وجہ ہے۔

انہوں نے کہا کہ لندن اور نیویارک میں بھی اسٹریٹ کرائم ہوتا ہے۔ ان کے بقول بریکنگ نیوز کی دوڑ میں اسٹریٹ کرائم کو نمایاں خبر بنا دیا گیا ہے۔

گورنر سندھ نے والدین پر زور دیا کہ وہ بچوں کی تربیت کریں۔ انہیں سمجھائیں کہ کسی کی چیز چھیننے سے کچھ حاصل نہیں ہوتا۔

ایپ کے ذریعے شکایت کا اسٹیٹس بھی معلوم ہوگا

پرنسپل سیکریٹری گورنر سندھ ڈاکٹر سیف الرحمان نے تقریب میں ایپ کے حوالے سے بریفنگ دی۔

انہوں نے بتایا کہ خدمت سندھ شکایات اور معلومات ایپ 65 صوبائی اور وفاقی اداروں سے منسلک ہے۔ شہری موبائل ایپ کے ذریعے اپنی شکایات درج کروا سکیں گے۔

ان کے مطابق کتوں کے کاٹنے سے متعلق شکایات بھی ایپ پر درج کی جا سکتی ہیں۔ شکایت موصول ہونے کے بعد متعلقہ ادارہ جواب دینے کا پابند ہوگا۔

شہری اپنی شکایت کی پیش رفت بھی چیک کر سکیں گے۔ جن افراد کے پاس موبائل فون نہیں، وہ گورنر ہاؤس کے گیٹ نمبر 4 پر شکایت درج کروا سکتے ہیں۔

تقریب میں ایڈیشنل آئی جی کراچی کی موجودگی میں ایپ کا افتتاح کیا گیا۔