کراچی: ڈی آئی جی ایسٹ زون ڈاکٹر فرخ علی کی سربراہی میں جرائم کی روک تھام سے متعلق اجلاس ہوا۔
اجلاس میں ایسٹ زون کے ضلعی ایس ایس پیز اور ایس پیز انویسٹیگیشن نے شرکت کی۔
ضلعی ایس ایس پیز نے اپنے علاقوں کے تمام تھانوں میں جرائم کی صورتحال اور پولیس اقدامات سے متعلق تفصیلی رپورٹس پیش کیں۔
مختلف جرائم کے خلاف کارروائیوں کا جائزہ
اجلاس میں گاڑیوں کی چوری و چھیننے، اسٹریٹ کرائم، قتل، ڈکیتی اور رابری کے مقدمات کا جائزہ لیا گیا۔
اشتہاری و مفرور ملزمان کے خلاف کارروائیوں پر بھی بریفنگ دی گئی۔ منشیات اور گٹکا ماوا کی خرید و فروخت میں ملوث افراد کے خلاف اقدامات کا بھی جائزہ لیا گیا۔
منظم جرائم میں ملوث ملزمان کے خلاف کارروائیوں پر مختلف تھانوں کے ایس ایچ اوز سے باز پرس کی گئی۔
اہم مقدمات کی تفتیش پر بھی غور
اجلاس میں انویسٹیگیشن ونگ کی کارکردگی کا بھی جائزہ لیا گیا۔
مختلف تھانوں کے ایس آئی اوز اور کیس انویسٹی گیشن افسران سے اہم مقدمات کی تفتیش میں پیش رفت کے بارے میں معلومات لی گئیں۔
عدم اطمینان پر بعض افسران کو شوکاز نوٹس بھی جاری کیے گئے۔
ڈی آئی جی ایسٹ نے ہدایت کی کہ مقدمات میں ملوث ملزمان کو جلد قانون کے کٹہرے میں لایا جائے۔ انہوں نے عادی مجرموں کو سزا دلوانے کے لیے مؤثر تفتیش پر بھی زور دیا۔
منظم جرائم کے خلاف کارروائی جاری رکھنے کی ہدایت
ڈاکٹر فرخ علی نے کہا کہ پولیس منظم جرائم میں ملوث ایسے عادی مجرموں کی سرگرمیوں پر نظر رکھے ہوئے ہے جو بقول ان کے بظاہر عام شہریوں کا روپ دھارے ہوئے ہیں۔
انہوں نے کہا کہ ایسے افراد کے خلاف کارروائی مزید تیز کی جائے گی اور انہیں قانون کے کٹہرے میں لانے کی کوشش جاری رہے گی۔