واٹر کارپوریشن کی جائیدادوں کی فروخت کی تردید، صرف قلیل مدتی لیز کے ضوابط منظور

کراچی (اسٹاف رپورٹر): کراچی واٹر اینڈ سیوریج کارپوریشن نے جائیدادوں سے متعلق شائع ہونے والی خبر پر وضاحت جاری کردی۔

کارپوریشن کے مطابق بورڈ آف ڈائریکٹرز نے کسی جائیداد کی فروخت یا مستقل منتقلی کی منظوری نہیں دی۔

بورڈ نے صرف قلیل مدتی لیز کے ضوابط 2026 کی منظوری دی ہے۔

لیز کی مدت زیادہ سے زیادہ تین سال

کارپوریشن نے بتایا کہ ضوابط کراچی واٹر اینڈ سیوریج کارپوریشن ایکٹ 2023 کی دفعہ 47 اور دفعہ 7(iv) کے تحت منظور کیے گئے۔

ان ضوابط کے تحت لیز کی مدت قانونی حد کے مطابق زیادہ سے زیادہ تین سال ہوسکتی ہے۔

کارپوریشن نے واضح کیا کہ ضوابط کی منظوری سے کسی مخصوص جائیداد کو لیز پر دینے کی اجازت نہیں ملتی۔

ہر معاملے کی الگ جانچ ہوگی

بیان کے مطابق کسی بھی جائیداد کی لیز کا معاملہ مقررہ مراحل سے گزرے گا۔

اس میں اراضی کے ریکارڈ، دستیابی اور قبضے کی جانچ شامل ہوگی۔

تکنیکی، مالی اور قانونی امور کا بھی جائزہ لیا جائے گا۔

تمام مراحل مکمل ہونے کے بعد معاملہ مجاز اتھارٹی یا بورڈ کے سامنے پیش کیا جائے گا۔

جائیداد کی لیز کے لیے مخصوص منظوری بھی ضروری ہوگی۔

پاک بحریہ کا بحیرہ عرب میں بڑا انسداد منشیات آپریشن

اثاثوں کے تحفظ پر زور

کارپوریشن کے مطابق منظور شدہ ضوابط کا مقصد جائیدادوں کا تصرف کرنا نہیں ہے۔

ان ضوابط کا مقصد قلیل مدتی لیز کے معاملات کو قانونی طریقہ کار میں لانا ہے۔

اس عمل میں شفافیت اور جوابدہی کو یقینی بنایا جائے گا۔

کارپوریشن نے کہا کہ اس کے اثاثوں کا تحفظ قانون کے مطابق کیا جائے گا۔

ادارے نے اپنی تمام جائیدادوں کے انتظام اور تحفظ کے عزم کا بھی اظہار کیا۔