کراچی: سندھ میں موٹروے پولیس کے پہلے ڈرائیونگ لائسنسنگ اتھارٹی فیسلیٹیشن سینٹر کا افتتاح کردیا گیا۔
ترجمان موٹروے پولیس کے مطابق جدید مرکز ایم نائن پر ڈی آئی جی موٹروے پولیس ساؤتھ زون کے دفتر میں قائم کیا گیا ہے۔
ایڈیشنل آئی جی ساؤتھ ریجن جاوید اکبر ریاض ستارہ امتیاز نے فیسلیٹیشن سینٹر کا افتتاح کیا۔
ترجمان کے مطابق کراچی سمیت سندھ بھر کے شہری جدید لائسنسنگ نظام سے فائدہ اٹھا سکیں گے۔ مرکز میں شفاف اور میرٹ پر مبنی لائسنسنگ سہولت فراہم کی جائے گی۔
مختلف کیٹیگریز کے لائسنس جاری ہوں گے
جاوید اکبر ریاض کے مطابق ابتدائی مرحلے میں مرکز سے موٹر سائیکل، کار، جیپ اور لائٹ ٹرانسپورٹ وہیکل (ایل ٹی وی) کے لائسنس بنائے جائیں گے۔
انہوں نے کہا کہ جدید لائسنسنگ نظام محفوظ ڈرائیونگ اور ذمہ دارانہ ٹریفک کلچر کے فروغ میں اہم کردار ادا کرے گا۔
ایڈیشنل آئی جی نے کہا کہ کراچی میں فیسلیٹیشن سینٹر کا قیام شہریوں کو جدید سفری سہولت فراہم کرنے کی جانب اہم قدم ہے۔
جہانگیر خان اور جمی انجینئر کی شرکت
افتتاحی تقریب میں اسکواش لیجنڈ جہانگیر خان اور معروف مصور جمی انجینئر نے بھی شرکت کی۔
جہانگیر خان نے جدید لائسنسنگ سینٹر کو کراچی اور سندھ کے شہریوں کے لیے موٹروے پولیس کا تحفہ قرار دیا۔
جدید آپریشنل مانیٹرنگ سینٹر بھی قائم
ایڈیشنل آئی جی جاوید اکبر ریاض نے زونل آفس میں نئے آپریشنل مانیٹرنگ سینٹر کا بھی افتتاح کیا۔
ترجمان کے مطابق جدید مانیٹرنگ سینٹر سے موٹروے پولیس کے آپریشنل نظام کو مزید مؤثر بنانے میں مدد ملے گی۔