خلیجی توانائی تنصیبات کی بحالی کیلئے امریکا کا 5 ارب ڈالر فنڈ کی تجویز

امریکا نے ایران کے ساتھ جاری جنگ کے دوران متاثر ہونے والی خلیجی توانائی تنصیبات کی بحالی کیلئے 5 ارب ڈالر کے فنڈ کی تجویز دی ہے۔

وال اسٹریٹ جرنل کی رپورٹ کے مطابق امریکا نے مجوزہ فنڈ میں 5 ارب ڈالر دینے کی پیشکش کی ہے۔

سعودی عرب، متحدہ عرب امارات، قطر، بحرین، کویت، عمان، عراق اور اردن سے مزید 5 ارب ڈالر ملنے کی توقع ہے۔

رپورٹ کے مطابق مجوزہ منصوبے کا نام ’پارٹنرشپ فار الائیڈ ٹرسٹ اینڈ کنسٹرکشن‘ رکھا گیا ہے۔

امریکی ڈویلپمنٹ فنانس کارپوریشن اس فنڈ کو چلائے گی۔ فنڈ سے جنگ میں تباہ ہونے والی پائپ لائنز اور ریفائنریاں دوبارہ تعمیر کی جائیں گی۔

مجوزہ منصوبے میں آبنائے ہرمز کے متبادل برآمدی راستے بنانے پر بھی توجہ دی جائے گی۔

امریکی حکام کے مطابق منصوبے پر بات چیت ابھی جاری ہے۔ مجوزہ فنڈ کی شرائط میں تبدیلی بھی ممکن ہے۔

حکام کے مطابق فی الحال یہ واضح نہیں کہ کون سے ممالک حتمی طور پر اس منصوبے میں شامل ہوں گے۔