وفاقی وزیر آئی ٹی و ٹیلی کمیونیکیشن شزا فاطمہ خواجہ نے کہا ہے کہ حکومت آئی ٹی برآمدات کو 50 ارب ڈالر تک لے جانے کا ہدف رکھتی ہے۔ ان کے مطابق پاکستان کو اس مقصد کے لیے بڑی تعداد میں تربیت یافتہ آئی ٹی ماہرین تیار کرنا ہوں گے۔
لاہور کی ایک نجی یونیورسٹی میں تقریب سے خطاب کرتے ہوئے شزا فاطمہ نے کہا کہ ایک لاکھ تربیت یافتہ آئی ٹی ماہرین پاکستان کی معیشت میں ایک ارب ڈالر کا اضافہ کر سکتے ہیں۔ انہوں نے کہا کہ حکومت آئی ٹی شعبے کی برآمدات بڑھانے کے لیے انسانی وسائل کی تیاری کو ترجیح دے رہی ہے۔
وفاقی وزیر نے کہا کہ حکومت آئی ٹی صنعت کے ساتھ مل کر برآمدات میں مسلسل ترقی کے لیے کام کر رہی ہے۔ ان کے مطابق عالمی سطح پر پاکستان کی بہتر مارکیٹنگ اور ملک کے بارے میں مثبت تاثر پیدا کرنا بھی آئی ٹی شعبے کی ترقی کے لیے ضروری ہے۔
شزا فاطمہ نے کہا کہ پاکستان کو آئی ٹی کے شعبے میں ہنرمند افرادی قوت کی کمی کا سامنا ہے۔ اس خلا کو دور کرنے کے لیے اسکول سے یونیورسٹی کی سطح تک طلبہ کو جدید مہارتوں سے آراستہ کرنا ضروری ہے۔
حادثہ جامشورو کے قریب ایم نائن پر مسافر بس الٹ گئی، 7 زخمی
انہوں نے بتایا کہ حکومت آئی ٹی شعبے کے لیے بڑے پیمانے پر تربیتی پروگرام چلا رہی ہے تاکہ نوجوانوں کو روزگار اور عالمی ٹیکنالوجی مارکیٹ کے تقاضوں کے مطابق تیار کیا جا سکے۔
وفاقی وزیر نے کہا کہ آئی ٹی ایک تیزی سے تبدیل ہونے والی صنعت ہے، اس لیے کاروبار اور لین دین میں آسانی پیدا کرنا انتہائی اہم ہے۔ ان کے مطابق دبئی اور سنگاپور میں ٹیکنالوجی کمپنی چند منٹوں میں رجسٹر ہو سکتی ہے، اس لیے پاکستان کو بھی آئی ٹی سرمایہ کاری کے لیے ایسا کاروباری ماحول فراہم کرنا ہوگا جو مقامی اور عالمی کمپنیوں کو راغب کرے۔
