میر رضا کیس میں فارنزک ڈویژن سندھ کی رپورٹ سامنے آگئی ہے۔ رپورٹ کے مطابق جائے وقوعہ سے ملنے والا 30 بور کا خول سیکیورٹی گارڈ کے پستول سے میچ نہیں ہوا۔
29 جولائی کو گلستان جوہر سے پی ای سی ایچ ایس بلاک 2 کے رہائشی نوجوان تاجر میر رضا علی کی لاش ملی تھی۔ پولیس واقعے کی تحقیقات جاری رکھے ہوئے ہے۔
پولیس کو 6 اگست کو جائے وقوعہ سے 30 بور کا خول ملا تھا۔ یہ خول 7 اگست کو میمو کے ذریعے فارنزک سائنس لیبارٹری پہنچایا گیا۔
خول کے نشانات مختلف نکلے
فارنزک رپورٹ کے مطابق کرائم سین سے ملنے والے خول اور پستول نمبر LA1197 سے حاصل کیے گئے دو ٹیسٹ خول آپس میں میچ نہیں ہوئے۔
رپورٹ میں بتایا گیا کہ دونوں خولوں کے اسٹرائیکر پن اور بریچ فیس کے نشانات مختلف ہیں۔
فارنزک ڈویژن نے رپورٹ 10 اگست کو جاری کردی تھی۔ سندھ پولیس کے مطابق یہ رپورٹ شروع ہی سے کیس فائل کا حصہ ہے۔
سندھ پولیس کی وضاحت
سندھ پولیس کے ترجمان نے میڈیا میں سامنے آنے والی اطلاعات پر وضاحت بھی جاری کی ہے۔
ترجمان کے مطابق جائے وقوعہ سے ملنے والا خول تفتیشی افسر نے خود فارنزک لیبارٹری میں جمع کرایا تھا۔ اسے تاخیر سے جمع کرانے کا تاثر درست نہیں۔
ترجمان نے کہا کہ فارنزک رپورٹ ابتدائی ضمنی چالان اور سندھ ہائی کورٹ کمیشن میں جمع کرائی گئی دستاویزات کا بھی حصہ ہے۔
اسلحہ ڈیلر کے خلاف کارروائی کی سفارش
فارنزک لیبارٹری نے متعلقہ اسلحہ ڈیلر کی غفلت کی نشاندہی بھی کی ہے۔ رپورٹ میں ڈیلر کے خلاف قانونی کارروائی کی سفارش کی گئی ہے۔
سندھ پولیس کے مطابق واردات میں استعمال ہونے والے پستول کی برآمدگی کے بعد خول کی شناخت کا عمل دوبارہ کیا جائے گا۔
پولیس نے میڈیا سے اپیل کی ہے کہ میر رضا کیس سے متعلق خبر نشر کرنے سے پہلے متعلقہ اداروں سے حقائق کی تصدیق کی جائے۔
