راولپنڈی: سکیورٹی فورسز نے پولیس کے ہمراہ گزشتہ چند روز کے دوران بلوچستان اور خیبر پختونخوا کے مختلف اضلاع میں مشترکہ انٹیلیجنس بیسڈ آپریشنز کیے، جن میں 49 دہشتگرد ہلاک ہوئے۔
پاک فوج کے شعبہ تعلقات عامہ (آئی ایس پی آر) کے مطابق بلوچستان کے اضلاع مستونگ، مچھ، خضدار اور پنجگور میں 10 انٹیلیجنس بیسڈ آپریشنز کیے گئے۔ ان کارروائیوں کے دوران بھارتی سرپرستی میں سرگرم فتنۃ الہندوستان سے تعلق رکھنے والے 37 دہشتگرد ہلاک ہوئے۔
آئی ایس پی آر کے مطابق بلوچستان میں کارروائیوں کے دوران بڑی تعداد میں ہتھیار، دھماکا خیز مواد اور ریموٹ ڈیٹونیشن آلات برآمد کیے گئے، جنہیں بعد ازاں تلف کردیا گیا۔
اسی طرح بنوں، شمالی وزیرستان، اورکزئی اور خیبر کے اضلاع میں بھی متعدد انٹیلیجنس بیسڈ آپریشنز کیے گئے۔ آئی ایس پی آر کے مطابق ان کارروائیوں میں بھارتی سرپرستی میں سرگرم فتنۃ الخوارج سے تعلق رکھنے والے 12 خوارج ہلاک ہوئے۔
کارروائیوں کے دوران دھماکا خیز مواد، آئی ای ڈیز، ہتھیار، گولہ بارود اور موٹرسائیکلیں بھی برآمد کی گئیں۔
آئی ایس پی آر کے مطابق یہ کارروائیاں بھارتی پراکسیز، فتنۃ الخوارج اور فتنۃ الہندوستان کے خاتمے کے لیے جاری بلا تعطل انسدادِ دہشت گردی مہم کا حصہ تھیں۔ سکیورٹی فورسز نے ملک کے امن و استحکام کو نقصان پہنچانے کی کوششوں کو مؤثر انداز میں ناکام بنایا۔
بیان کے مطابق سکیورٹی فورسز ملکی سرحدوں کے دفاع کے عزم پر ثابت قدم اور غیر متزلزل ہیں۔ علاقے میں موجود دیگر بھارتی سرپرستی میں سرگرم عناصر کے خاتمے کے لیے سینیٹائزیشن آپریشنز بھی جاری ہیں۔
آئی ایس پی آر نے کہا کہ ملک سے دہشتگردی کے مکمل خاتمے تک انسدادِ دہشت گردی مہم جاری رہے گی۔
