کراچی: شاہراہِ نور جہاں پولیس مقابلے میں ہلاک ملزم کی شناخت بلال کے نام سے ہوئی ہے۔ پولیس کے مطابق بلال مبینہ طور پر بھتہ خور گروپ صمد کاٹھیاواڑی اور جمیل چھانگا گروپ کا اہم رکن، کمانڈر اور متحرک شوٹر تھا۔
پولیس کے مطابق علی الصبح نارتھ ناظم آباد کے بلاک یو میں عبداللہ کالج کے قریب مین روڈ پر اہلکاروں اور مبینہ بھتہ خور ملزمان کے درمیان فائرنگ کا تبادلہ ہوا۔ مقابلے میں بلال ہلاک ہوگیا جبکہ اس کا ساتھی فرار ہوگیا۔
پولیس نے ہلاک ملزم کے قبضے سے 9 ایم ایم پستول، لوڈ میگزین، 10 زندہ گولیاں اور دو موبائل فون برآمد کیے۔ پولیس کا کہنا ہے کہ بلال بھتہ خوری کے لیے فائرنگ اور علاقے میں خوف و ہراس پھیلانے میں بھی ملوث رہا ہے۔
پولیس کے مطابق ملزم مختلف علاقوں میں بھتہ طلب کرنے کی پرچیاں پہنچاتا اور رقم نہ ملنے پر فائرنگ کرتا تھا۔ تفتیشی حکام نے اس کی مبینہ بھتہ خوری سے متعلق متعدد واقعات کی سی سی ٹی وی فوٹیجز بھی حاصل کرلی ہیں۔
پولیس ریکارڈ کے مطابق بلال مختلف مقدمات میں گرفتار ہوکر جیل جاچکا تھا اور کراچی کے مختلف تھانوں میں اس کے خلاف مقدمات درج ہیں۔
پولیس کے مطابق 10 اگست کو نیو کراچی انڈسٹریل ایریا میں گوجابا سویٹس پر بھتہ نہ ملنے کے بعد فائرنگ کے واقعے میں بھی بلال ملوث تھا۔ فائرنگ کے نتیجے میں ایک پولیس اہلکار اور دو راہگیر زخمی ہوئے تھے۔ پولیس نے اس واقعے کی سی سی ٹی وی فوٹیج بھی حاصل کرلی ہے۔
تفتیش کے دوران پولیس کو گزشتہ ماہ فیروزآباد میں ایک زیرِ تعمیر منصوبے سے بھتہ طلب کیے جانے کا بھی سراغ ملا۔ پولیس کے مطابق رقم نہ ملنے پر ملزم نے منصوبے پر فائرنگ کی، جس کی سی سی ٹی وی فوٹیج بھی حاصل کرلی گئی ہے۔
پولیس کے مطابق گزشتہ ماہ گلبرگ میں واقع لاکھا اسٹیٹ اینڈ بلڈرز سے بھی بھتہ طلب کیا گیا تھا۔ رقم نہ ملنے پر بلال نے مبینہ طور پر ادارے کے دفتر پر فائرنگ کی، جبکہ اس واقعے کی فوٹیج بھی پولیس نے حاصل کرلی ہے۔
پولیس کا کہنا ہے کہ بلال نے گزشتہ ماہ سرجانی اور منگھوپیر میں زیرِ تعمیر منصوبوں کو بھی بھتے کی پرچیاں دیں۔ رقم نہ ملنے پر اس نے مبینہ طور پر وہاں پہنچ کر فائرنگ کی۔
پولیس نے تمام واقعات کے مقدمات درج کرکے مزید تفتیش شروع کردی ہے تاکہ ہلاک ملزم کے دیگر ساتھیوں اور مبینہ بھتہ خوری کے نیٹ ورک کا بھی سراغ لگایا جاسکے۔