عید میلاد کے موقع پر کراچی کے ضلع وسطی میں جشن عید میلاد النبیؐ کے انتظامات کو حتمی شکل دینے کے لیے ڈپٹی کمشنر ضلع وسطی طحہ سلیم کی زیر صدارت کراچی ڈینٹل اینڈ میڈیکل کالج، نارتھ ناظم آباد میں ایک مشاورتی اجلاس منعقد ہوا۔ اجلاس میں متعلقہ اداروں کے افسران، مختلف مکاتب فکر کے علما، مشائخ، مساجد و امام بارگاہوں کے نمائندوں اور جلوس و محفل میلاد کے منتظمین نے شرکت کی۔
ڈپٹی کمشنر طحہ سلیم نے کہا کہ مسلمان 12 ربیع الاول کو حضور اکرم ﷺ کی ولادت باسعادت انتہائی عقیدت و احترام سے مناتے ہیں، اس لیے ضلعی انتظامیہ جشن کو پرامن، منظم اور خوش اسلوبی سے منعقد کرانے کے لیے تمام ضروری اقدامات کر رہی ہے۔
انہوں نے کہا کہ شہریوں کو بہتر بلدیاتی سہولیات فراہم کرنا انتظامیہ کی اولین ترجیح ہے۔ صفائی ستھرائی، سکیورٹی، اسٹریٹ لائٹس، پانی کی فراہمی، ٹریفک مینجمنٹ اور دیگر بنیادی سہولیات کے لیے خصوصی انتظامات کیے جائیں گے تاکہ عوام کو کسی قسم کی دشواری کا سامنا نہ کرنا پڑے۔
اجلاس کے دوران مختلف علاقوں سے تعلق رکھنے والے علما کرام، مشائخ اور جلوس و محفل میلاد کے منتظمین نے اپنے اپنے علاقوں کے مسائل اور تجاویز پیش کیں، جبکہ ٹاؤن انتظامیہ اور دیگر متعلقہ اداروں نے انتظامات سے متعلق بریفنگ دی۔
ڈپٹی کمشنر نے تمام متعلقہ اداروں کو ہدایت کی کہ وہ باہمی رابطہ مؤثر رکھیں اور جشن عید میلاد النبیؐ کے دوران امن و امان برقرار رکھنے، سکیورٹی اہلکاروں کی تعیناتی، ٹریفک کی روانی اور شہری سہولیات کی فراہمی کو یقینی بنائیں۔
انہوں نے مزید ہدایت کی کہ مساجد، امام بارگاہوں اور جلوس کے راستوں پر صفائی، روڈ کارپیٹنگ اور دیگر انتظامات علما کرام اور منتظمین کی مشاورت سے بروقت مکمل کیے جائیں تاکہ جشن عید میلاد النبیؐ پرامن اور منظم ماحول میں منعقد ہو سکے۔
