ڈیفنس میں بکتر بند اور لگژری گاڑیوں کی نمائش کی وائرل ویڈیو کے معاملے میں پولیس تحقیقات آگے بڑھ گئی ہیں۔
پولیس نے پہلے سے گرفتار ملزم سفیان کی نشاندہی پر مزید تین افراد کو حراست میں لے لیا۔ پولیس ذرائع کے مطابق یہ افراد ویڈیو میں نظر آنے والی گاڑیاں چلا رہے تھے۔
ویڈیو میں نظر آنے والی گاڑیوں کی تلاش
پولیس ذرائع کے مطابق سوشل میڈیا پر ویڈیو وائرل ہونے کے بعد درج مقدمے کی تفتیش جاری ہے۔
دورانِ تفتیش گرفتار ملزم سفیان کی نشاندہی پر تین مزید افراد کو حراست میں لیا گیا۔ ذرائع کا کہنا ہے کہ یہ افراد وائرل ویڈیو میں شامل گاڑیوں کے ڈرائیور تھے۔
پولیس نے ویڈیو بنوانے والے شہری کی لگژری گاڑی بھی ضبط کرلی ہے۔ تاہم ویڈیو میں نظر آنے والی بکتر بند اور دیگر گاڑیاں تاحال پولیس کو نہیں مل سکیں۔
ویڈیو میں بعض لگژری گاڑیوں پر پولیس طرز کی فلیشر لائٹس بھی نصب تھیں۔ پولیس ان لائٹس کے استعمال سے متعلق بھی تحقیقات کر رہی ہے۔
پولیس ذرائع نے دعویٰ کیا ہے کہ مقدمے میں نامزد کمپنی اس سے قبل بھی متعدد مرتبہ ضابطہ اخلاق کی خلاف ورزی کرچکی ہے۔
تھانہ ساحل میں مقدمہ درج
چند روز قبل ڈیفنس کے علاقے دو دریا میں بکتر بند اور لگژری گاڑیوں کے قافلے کی ویڈیو سوشل میڈیا پر وائرل ہوئی تھی۔
ویڈیو سامنے آنے کے بعد پولیس نے معاملے کا نوٹس لیا۔ تھانہ ساحل میں مقدمہ نمبر 315/2026 درج کیا گیا۔
مقدمے میں مجموعی طور پر چھ افراد کو نامزد کیا گیا تھا۔ ان میں بکتر بند گاڑیاں فراہم کرنے والی کمپنی ایس اینڈ ٹی آرمرڈ کے منیجر سفیان اور فور بائی فور ایکسٹریم کی مالک نورین شیخ بھی شامل ہیں۔
ابتدائی کارروائی میں پولیس نے دو افراد کو گرفتار کیا تھا۔ اس دوران ایک لینڈ کروزر بھی تحویل میں لی گئی تھی۔
پولیس کے مطابق معاملے کی مزید تحقیقات جاری ہیں۔