ڈیجیٹل سندھ کے وژن کو آگے بڑھاتے ہوئے وزیراعلیٰ سندھ مراد علی شاہ نے جدید صوبائی ڈیٹا سینٹر کے قیام کے لیے جامع منصوبہ تیار کرنے کی ہدایت جاری کر دی۔
این ٹی سی کے ساتھ اجلاس
یہ فیصلہ وزیراعلیٰ ہاؤس میں نیشنل ٹیلی کمیونیکیشن کارپوریشن (این ٹی سی) کے حکام کے ساتھ اجلاس میں کیا گیا۔
اجلاس میں پرنسپل سیکریٹری آغا واصف، معاون خصوصی برائے آئی ٹی محمد علی شاہ اور دیگر اعلیٰ حکام نے شرکت کی۔
ڈیٹا سینٹر کا منصوبہ
این ٹی سی نے وزیراعلیٰ کو جدید ڈیٹا سینٹر کے منصوبے پر بریفنگ دی۔
حکام نے بتایا کہ کراچی میں ٹائر تھری معیار کا جدید ڈیٹا سینٹر قائم کیا جائے گا۔
ڈیٹا سینٹر سرکاری اداروں کو محفوظ ہوسٹنگ، کلاؤڈ سروسز اور ڈیزاسٹر ریکوری کی سہولت فراہم کرے گا۔
ڈیجیٹل گورننس کو فروغ
اجلاس میں ٹیلی کمیونیکیشن، ڈیٹا مینجمنٹ، سائبر سیکیورٹی اور کلاؤڈ سروسز پر تعاون کا جائزہ لیا گیا۔
مراد علی شاہ نے کہا کہ محفوظ ڈیٹا انفراسٹرکچر جدید حکمرانی کی بنیادی ضرورت بن چکا ہے۔
انہوں نے کہا کہ سرکاری ڈیٹا قومی اثاثہ ہے۔ اس کا تحفظ اور مؤثر انتظام انتہائی ضروری ہے۔
دیہی علاقوں کو فائدہ
وزیراعلیٰ سندھ نے کہا کہ منصوبے سے دور دراز علاقوں میں ڈیجیٹل رابطہ بہتر ہوگا۔
انہوں نے کہا کہ تیز رفتار انٹرنیٹ سے صحت، تعلیم اور آن لائن سرکاری خدمات تک رسائی آسان ہوگی۔
سیف سٹی منصوبے میں مدد
مراد علی شاہ نے کہا کہ صوبائی ڈیٹا سینٹر سیف سٹی منصوبے کو مضبوط بنائے گا۔
انہوں نے کہا کہ اس سے جدید نگرانی اور حقیقی وقت میں ڈیٹا پراسیسنگ ممکن ہوگی۔
روڈ میپ تیار کرنے کی ہدایت
وزیراعلیٰ سندھ نے پلاننگ اینڈ ڈویلپمنٹ بورڈ، محکمہ آئی ٹی اور این ٹی سی کو مشترکہ روڈ میپ تیار کرنے کی ہدایت دی۔
انہوں نے کہا کہ منصوبہ عالمی سائبر سیکیورٹی اور ڈیٹا تحفظ کے معیار کے مطابق تیار کیا جائے۔
اجلاس میں سندھ حکومت اور این ٹی سی نے ڈیجیٹل تعاون مزید بڑھانے پر بھی اتفاق کیا۔