کینسر ادویات کے حوالے سے سندھ ڈرگ ٹیسٹنگ لیبارٹری نے اہم الرٹ جاری کرتے ہوئے کینسر کے علاج میں استعمال ہونے والی 9 ادویات کو غیر معیاری، جعلی اور غیر رجسٹرڈ قرار دیا ہے۔
کراچی میں جاری بیان کے مطابق سندھ ڈرگ ٹیسٹنگ لیبارٹری نے مارکیٹ سے حاصل کیے گئے نمونوں کی جانچ مکمل کی۔ ٹیسٹنگ کے بعد متعدد ادویات میں سنگین بے ضابطگیاں سامنے آئیں۔
ڈائریکٹر سندھ ڈرگ ٹیسٹنگ لیبارٹری سید عدنان رضوی نے بتایا کہ بعض ادویات میں مطلوبہ فعال دوا موجود ہی نہیں تھی، جبکہ کئی ادویات پر ڈرگ ریگولیٹری اتھارٹی آف پاکستان (DRAP) کا رجسٹریشن نمبر بھی درج نہیں تھا۔
ملیر انویسٹیگیشن: قتل، فراڈ اور دیگر مقدمات میں مطلوب ملزمان گرفتار، مغویہ بازیاب
متاثرہ ادویات کی فہرست
لیبارٹری نے جن ادویات کو غیر معیاری، جعلی یا غیر رجسٹرڈ قرار دیا، ان میں Cyclophosphamide، Sorafenib، Arimidex، Lenalidomide، Leukeran، Lenvatinib، Nintedanib، Lenvaxen اور Gefitinib شامل ہیں۔
فارمیسیز اور اسپتالوں کو ہدایات
سندھ ڈرگ ٹیسٹنگ لیبارٹری نے تمام ڈسٹری بیوٹرز، فارمیسیز اور اسپتالوں کو ہدایت کی ہے کہ وہ ان ادویات کا موجودہ اسٹاک فوری طور پر سیل کریں اور متعلقہ ڈرگ انسپکٹر کو اطلاع دیں۔
بیان میں خبردار کیا گیا ہے کہ ہدایات پر عمل نہ کرنے والوں کے خلاف قانونی کارروائی کی جائے گی۔
عوام کے لیے ہدایت
لیبارٹری نے مریضوں سے اپیل کی ہے کہ دوا خریدتے وقت DRAP رجسٹریشن نمبر، بیچ نمبر اور مینوفیکچرر کی تفصیلات ضرور چیک کریں۔
بیان میں کہا گیا ہے کہ اگر کوئی مریض ان ادویات میں سے کسی کا استعمال کر رہا ہے تو وہ فوری طور پر اپنے معالج سے رابطہ کرے۔
