گوادر: افغان ٹرانزٹ ٹریڈ کے تحت دوسرا بحری جہاز کامیابی سے گوادر پورٹ پر لنگرانداز ہو گیا۔ 20 ہزار ٹن ڈی اے پی کھاد لے کر آنے والا افغان جہاز بندرگاہ پر پہنچنے کے بعد گوادر کی تجارتی صلاحیت میں ایک اور سنگ میل کا اضافہ کر گیا ہے۔
گوادر پورٹ اتھارٹی کے چیئرمین جنید انوار چوہدری نے اس موقع پر کہا کہ افغان جہاز کی کامیاب آمد گوادر بندرگاہ پر عالمی اعتماد کی بڑھتی ہوئی گواہی ہے۔ ان کا کہنا تھا کہ گوادر اب تیزی سے خطے کا اہم تجارتی گیٹ وے بنتا جا رہا ہے، جو نہ صرف پاکستان بلکہ افغانستان کے لیے بھی بین الاقوامی منڈیوں تک رسائی کا مؤثر ذریعہ بن رہا ہے۔
انہوں نے مزید کہا کہ بندرگاہ مکمل طور پر تجارتی سامان سنبھالنے کی صلاحیت رکھتی ہے اور گوادر سے ٹرانزٹ کے اخراجات میں واضح کمی کی امید کی جا رہی ہے۔ جنید انوار کے مطابق گوادر کی یہ پیش رفت پاکستان کی کامیاب بحری پالیسیوں کا ثبوت ہے اور پاکستان و افغانستان کے تجارتی تعلقات کو مزید مضبوط بنانے میں مدد دے گی۔
یاد رہے کہ یہ جہاز فروری کے بعد افغان ٹرانزٹ ٹریڈ کے تحت گوادر پہنچنے والا دوسرا جہاز ہے، جس سے گوادر پورٹ کی اہمیت اور افادیت میں مسلسل اضافہ دیکھنے میں آ رہا ہے۔
