کوئٹہ: وزیر اعلیٰ بلوچستان میر سرفراز بگٹی سے پاکستان پیپلزپارٹی کے صوبائی وزراء اور اراکین اسمبلی نے ملاقات کی، جس میں ڈپٹی اسپیکر محترمہ غزالہ گولہ بھی شریک تھیں۔ ملاقات میں آئندہ مالی سال کے بجٹ، عوامی فلاح و بہبود، پارلیمانی امور اور ترقیاتی منصوبوں پر تفصیلی تبادلہ خیال کیا گیا۔
کراچی میں رینجرز اور پولیس کا منشیات فروشوں کے خلاف بڑا کریک ڈاؤن، 8 ملزمان گرفتار
پیپلزپارٹی کے وفد نے پیپلز ٹرین سروس کے آغاز پر خوشی کا اظہار کرتے ہوئے صوبائی حکومت کی گورننس، صحت، امن و امان اور ترقیاتی میدان میں کارکردگی کو سراہا۔ اس موقع پر وزیر اعلیٰ نے بتایا کہ بلوچستان کی تاریخ میں پہلی بار پی ایس ڈی پی فنڈز کا 90 فیصد سے زائد استعمال ممکن ہوا ہے، جو عملی کارکردگی کا مظہر ہے۔
میر سرفراز بگٹی کا کہنا تھا کہ بلوچستان میں سیاسی اتفاق رائے اور بین الجماعتی ہم آہنگی کو فروغ دے رہے ہیں۔ ان کا کہنا تھا کہ ہماری حکومت کا مقصد صرف بجٹ سازی نہیں بلکہ عوامی خدمت ہے، اور بجٹ تجاویز میں تمام پارلیمانی جماعتوں کی مشاورت کو شامل کیا جا رہا ہے۔
انہوں نے کہا کہ ترقیاتی منصوبے محض کاغذی دعوے نہیں، بلکہ زمین پر کام ہوتا نظر آئے گا۔ عوام کا اعتماد بحال کرنا اور سروس ڈلیوری کو بہتر بنانا حکومت کی اولین ترجیح ہے۔ وزیر اعلیٰ نے زور دیا کہ تمام اسٹیک ہولڈرز کو مل کر بلوچستان کے روشن مستقبل کی بنیاد رکھنی ہوگی۔
مزید برآں، میر سرفراز بگٹی نے صدر آصف علی زرداری کی سیاسی بصیرت کو ملکی استحکام کی ضمانت قرار دیا اور چیئرمین بلاول بھٹو زرداری کی وژنری قیادت کو پاکستان کا روشن چہرہ اور ترقی، جمہوریت و یکجہتی کی علامت قرار دیا۔