کراچی: نئے آئی جی جیل خانہ جات فدا حسین مستوی نے ڈی آئی جی اسلم ملک کے ہمراہ ملیر ڈسٹرکٹ جیل لانڈھی کا دورہ کیا اور حالیہ واقعے کی جگہ کا معائنہ کیا۔
ڈپٹی سپریڈنٹ جیل شہاب صدیقی نے بریفنگ میں بتایا کہ جیل سے فرار ہونے والے 139 قیدیوں کو دوبارہ گرفتار کیا جا چکا ہے، جبکہ زلزلے کے دوران فرار ہونے والے مزید 76 قیدیوں کی تلاش جاری ہے۔
آئی جی جیل نے سیکیورٹی انتظامات مزید سخت کرنے کی ہدایت دیتے ہوئے کہا کہ جیل کی حدود میں کسی قسم کی کوتاہی برداشت نہیں کی جائے گی۔ انہیں بتایا گیا کہ سیکیورٹی بہتر بنانے کے لیے چوبیس گھنٹے کام جاری ہے۔
شہاب صدیقی کے مطابق جیل کی عمارتیں اور چار دیواری محفوظ اور مستحکم ہیں، فی الحال کسی قسم کا سیکیورٹی خدشہ درپیش نہیں۔ حکام کے مطابق دروازوں اور کنڈوں کو مضبوط کرنے کے ساتھ ساتھ عملے کی تعداد بھی بڑھائی جا رہی ہے۔
انہوں نے مزید کہا کہ تمام اقدامات جیل مینول کے مطابق مکمل کیے جا رہے ہیں تاکہ مستقبل میں کسی بھی ناخوشگوار واقعے سے بچا جا سکے۔
