کراچی: وزیراعلیٰ سندھ مراد علی شاہ کی خصوصی شرکت سے فرسٹ ٹیکنالوجی شوکیس “سندھ انوویٹو اسٹارٹ اپ ایگزیبیشن 2025ء” کا افتتاح ہوا۔ تقریب سے خطاب میں وزیراعلیٰ نے کہا کہ یہ نمائش سندھ کے معاشی مستقبل کے لیے سنگِ میل ثابت ہوگی اور ایک ایسا ماحولیاتی نظام قائم کیا جا رہا ہے جہاں نئی صلاحیتیں خود کو منوا رہی ہیں۔ مختلف ممالک کے سفارت کاروں کی شرکت کو فخر کی بات قرار دیتے ہوئے انہوں نے کہا کہ جدت اور تخلیقی کامیابیاں ہمارے راستے کا تعین کریں گی۔
ایس ایس پی ملیر کا انسداد پولیو مہم کے دوسرے روز یوسیز اور اسپتالوں کا دورہ
ایگزیبیشن میں 50 تخلیقی پروجیکٹس پیش کیے گئے، جنہیں صنعت اور تعلیمی اداروں کے مابین پُل کا کردار سونپا گیا ہے۔ چھ نوجوان پیشہ ورانہ انداز میں اپنے پروٹوٹائپس (MVPs) اور مالی ماڈلز بھی متعارف کروا رہے ہیں جن میں سے صنعت کار پانچ بہترین منصوبوں کا انتخاب کریں گے۔ ہر جیتنے والی ٹیم کو پانچ لاکھ روپے نقد انعام دیا جائے گا تاکہ نوجوانوں کی حوصلہ افزائی اور جدت کے سفر کو آگے بڑھایا جا سکے۔
مراد علی شاہ نے کہا کہ جامعات کو نہ صرف گریجویٹس تیار کرنا چاہیے بلکہ مسائل کے حل تلاش کرنے والے موجد بھی پیدا کرنے ہوں گے۔ انہوں نے او آر آئی سیز (ORICs) کو فعال لانچ پیڈ بنانے پر زور دیا تاکہ تحقیق اور عملی دنیا کا فاصلہ ختم ہو۔ “یہ صرف ایک تعلیمی تقریب نہیں بلکہ ایک کامیابی کے سفر کا آغاز ہے”، وزیراعلیٰ نے کہا۔ انہوں نے موہنجو دڑو اور ہڑپا کی قدیم تہذیبوں کا حوالہ دیتے ہوئے کہا کہ سندھ نئی اختراعات کی خالق ہے۔
چیئرمین سندھ ہائر ایجوکیشن کمیشن ڈاکٹر طارق رفیع نے بھی خطاب کرتے ہوئے بتایا کہ یہ نمائش ایچ ای سی اور ایف پی سی سی آئی کے اشتراک کا چوتھا مرحلہ ہے۔ ان کا کہنا تھا کہ کامیاب صنعتیں اپنی تحقیقی کامیابیوں پر انحصار کرتی ہیں اور ORICs کو آئیڈیاز کے عملی حل پیش کرنے والا مرکز بنایا جانا چاہیے۔