فیڈرل بی ایریا بلاک 22، مس النور قبرستان کے قریب تین مسلح ڈاکوؤں نے موٹرسائیکل سوار شہری کو لوٹ کر موٹرسائیکل اور موبائل فون چھین لیا اور فرار ہوگئے۔
واقعے کی اطلاع ملتے ہی شاہین فورس ایف بی انڈسٹریل ایریا نے فوری تعاقب کیا، جس کے نتیجے میں ایک ڈاکو موٹر سائیکل سے گر گیا، جبکہ دوسرے ملزم کو بھی فورس کے جوانوں نے بروقت کارروائی کرتے ہوئے دھر لیا۔ تیسرا ملزم موقع سے فرار ہونے میں کامیاب ہوگیا۔
واردات اور تعاقب کی سی سی ٹی وی فوٹیج بھی حاصل کر لی گئی ہے، جو تفتیش میں مددگار ثابت ہو رہی ہے۔ گرفتار ملزمان کی شناخت شاکر عرف بلے ولد نورالدین اور عدنان ولد بادشاہ خان کے طور پر ہوئی ہے۔
پولیس نے ملزمان کے قبضے سے دو 30 بور پستول، لوڈ میگزین اور چھینی گئی موٹر سائیکل برآمد کر لی ہے۔ ملزمان کے خلاف مقدمات درج کر کے تفتیش شروع کر دی گئی ہے، جبکہ فرار ملزم کی تلاش کے لیے چھاپے مارے جا رہے ہیں۔