کراچی: ثانوی تعلیمی بورڈ کراچی کے تحت جاری سالانہ امتحانات آج سترہویں روز میں داخل ہو چکے ہیں۔ طلبہ و طالبات مختلف مضامین کے پرچے دے رہے ہیں، جبکہ بورڈ انتظامیہ امتحانات کو شفاف، منظم اور سہولیات سے آراستہ بنانے کے لیے سرگرم عمل ہے۔
آج کی پہلی شفٹ میں جماعت نہم (سائنس گروپ) کے طلبہ سے ریاضی کا پرچہ لیا جا رہا ہے، جبکہ دوسری شفٹ میں جماعت دہم (جنرل گروپ) کے طلبہ کا علمِ شہریت سمیت دیگر مضامین کا امتحان لیا جائے گا۔
چیئرمین میٹرک بورڈ غلام حسین سہو کے مطابق:
میٹرک بورڈ کے نظام کو ڈیجیٹلائز کرنے پر تیزی سے کام جاری ہے تاکہ آئندہ امتحانات مزید بہتر اور شفاف طریقے سے منعقد ہو سکیں۔
ویجلینس ٹیمیں اور متعلقہ افسران امتحانی مراکز میں طلبہ کو درپیش سہولیات کی فراہمی یقینی بنائیں۔
سینٹر سپرنٹنڈنٹس سے کہا گیا ہے کہ وہ شفاف امتحانات کو یقینی بنانے میں بھرپور کردار ادا کریں۔
امتحانی مراکز میں ٹھنڈے پانی کی فراہمی کو ہر صورت یقینی بنایا جائے تاکہ گرمی میں طلبہ کو دشواری نہ ہو۔
چیئرمین کے مطابق امسال امتحانات بہتر نظم و ضبط اور شفافیت کے ساتھ پایہ تکمیل کی جانب گامزن ہیں اور نقل جیسی لعنت پر کافی حد تک قابو پایا گیا ہے، جو کہ ایک خوش آئند پیشرفت ہے۔