شی آن (چین) – نمائندہ خصوصی شنگھائی تعاون تنظیم (SCO) کے وزرائے صحت کا آٹھواں اجلاس 27 سے 28 اپریل 2025 تک چین کے شمال مغربی صوبے شانشی کے شہر شی آن میں کامیابی کے ساتھ منعقد ہوا۔
پاکستان کی نمائندگی وفاقی وزیر صحت سید مصطفیٰ کمال نے کی، جنہوں نے اجلاس میں صحت کے شعبے میں رکن ممالک کے درمیان باہمی تعاون کی اہمیت پر زور دیا۔
اجلاس میں رکن ممالک نے ہنگامی طبی امداد، بنیادی صحت کی سہولیات، ڈیجیٹل ہیلتھ اور روایتی طب جیسے شعبوں میں مشترکہ تعاون کو فروغ دینے پر اتفاق کیا۔ اس موقع پر عالمی سطح پر درپیش صحت کے چیلنجز سے نمٹنے اور پائیدار صحت کی ترقی کو آگے بڑھانے کے عزم کا اعادہ بھی کیا گیا۔
یہ اجلاس شنگھائی تعاون تنظیم کے پلیٹ فارم پر صحت کے شعبے میں علاقائی ہم آہنگی کے لیے ایک اہم سنگ میل قرار دیا جا رہا ہے۔
