کراچی: سندھ حکومت کی جانب سے ٹریفک قوانین کی خلاف ورزیوں کے خلاف بھرپور کریک ڈاؤن جاری ہے جس کے دوران صرف ایک ہفتے میں 11,276 موٹر سائیکلیں ضبط کر لی گئی ہیں۔ اس اہم مہم کی قیادت صوبائی وزیر اطلاعات، ٹرانسپورٹ و ماس ٹرانزٹ شرجیل انعام میمن کر رہے ہیں، جنہوں نے اس حوالے سے تفصیلی بریفنگ بھی دی۔
پیپلز پارٹی مزدوروں کے حقوق کی محافظ ہے، بلاول بھٹو شہید بھٹو کے مشن پر گامزن ہیں: سعید غنی
شرجیل میمن کے مطابق، فینسی نمبر پلیٹس، کالے شیشے اور دیگر غیر قانونی ترامیم کے خلاف مجموعی طور پر 831 کارروائیاں کی گئی ہیں، جب کہ ہیوی اور لائٹ ٹرانسپورٹ وہیکلز کی 223 گاڑیاں قبضے میں لی گئی ہیں۔ انہوں نے مزید بتایا کہ 25 گاڑیوں کی رجسٹریشن منسوخ کرنے کی سفارش کی گئی ہے جبکہ 174 گاڑیوں کی رجسٹریشن عارضی طور پر معطل کرتے ہوئے انہیں مخصوص شرائط کے تحت چھوڑا گیا۔
صوبائی وزیر نے کہا کہ یہ کارروائیاں بلا امتیاز جاری رہیں گی، اور ٹریفک نظام میں بہتری، شہریوں کی حفاظت اور قانون کی بالادستی کو یقینی بنانے کے لیے تمام ادارے مکمل طور پر متحرک ہیں۔ انہوں نے واضح کیا کہ قانون شکنی کرنے والوں کے ساتھ کسی قسم کی نرمی نہیں برتی جائے گی۔
شرجیل میمن کا کہنا تھا کہ ٹریفک کے بہتر نظام کے لیے تمام وسائل بروئے کار لائے جا رہے ہیں۔ بغیر فٹنس سرٹیفکیٹ کے چلنے والی گاڑیاں شہریوں کی زندگیوں کے لیے خطرہ ہیں، اس لیے تمام شہریوں سے اپیل ہے کہ وہ قانون کا احترام کریں اور اپنی گاڑیوں کو مکمل دستاویزات، فٹنس اور رجسٹریشن کے ساتھ سڑک پر لائیں۔
یہ مہم ایک جانب قانون کی بالادستی کی علامت ہے تو دوسری جانب یہ حکومت کی عوامی تحفظ کے لیے سنجیدگی کا بھی واضح ثبوت ہے۔ شہریوں کو چاہیے کہ وہ قوانین کی پابندی کرتے ہوئے اس مہم کا حصہ بنیں تاکہ ٹریفک نظام کو بہتر اور محفوظ بنایا جا سکے۔