کراچی: میئر کراچی بیرسٹر مرتضیٰ وہاب نے گورنر سندھ کامران ٹیسوری اور ایم کیو ایم پاکستان کے رہنما فاروق ستار پر شدید تنقید کی ہے۔ ایک نیوز کانفرنس میں میئر کراچی نے کہا کہ کراچی اب ماضی کے وہ دن نہیں رہا جب یہاں بوری بند لاشیں، پہیہ جام اور بھتہ خوری معمول کی بات تھی۔
گورنر سندھ کامران خان ٹیسوری کی سعود آباد آمد، ٹریفک حادثات کے متاثرین کے خاندانوں سے اظہار تعزیت
میئر کراچی نے گورنر سندھ پر تنقید کرتے ہوئے کہا کہ وہ خود کو عوامی گورنر کہتے ہیں مگر سڑکیں بلاک کر کے عوام کو مشکلات میں مبتلا کیا جاتا ہے۔ انہوں نے مزید کہا کہ گزشتہ 20 دنوں سے وہ کراچی کا مقدمہ وفاقی نمائندوں کے خلاف لڑ رہے ہیں۔
فاروق ستار کے بارے میں بات کرتے ہوئے میئر کراچی نے کہا کہ انہوں نے جس لہجے میں بات کی وہ افسوسناک ہے۔ وہ یاد دلاتے ہوئے کہا کہ یہ 1988، 1990 یا 12 مئی کا کراچی نہیں ہے، ہم حکومت میں ہیں اور آپ گورنر ہیں، لہٰذا اختیارات کی رکاوٹ ڈالنے کی بجائے مل کر کام کرنا چاہیے۔
مرتضیٰ وہاب نے کہا کہ گورنر ہاؤس میں آئی ٹی کورسز چلائے جا رہے ہیں مگر اس میں کوئی یونیورسٹی شامل نہیں ہے، اگر واقعی عوامی خدمت کا جذبہ ہے تو گورنر ہاؤس کو یونیورسٹی میں تبدیل کیا جائے۔
انہوں نے ایم کیو ایم پر الزام عائد کیا کہ جب بھی کوئی اچھا کام ہوتا ہے، وہ اس کا کریڈٹ لینے آ جاتے ہیں، حالانکہ اگر وہ عوامی گورنر ہیں تو کراچی کے لیے 100 ارب روپے لے کر آئیں۔
میئر کراچی نے بلوچ کالونی نالے کے مسئلے کو حل کرنے کا اعلان کرتے ہوئے کہا کہ کے ایم سی اور ڈی ایم سیز نے صنعت کاروں اور رہائشیوں کی شکایات سن کر اس پر کام کرنے کا فیصلہ کیا ہے۔ انہوں نے واضح کیا کہ کراچی کے مسائل ڈراموں سے نہیں بلکہ فنڈز سے حل ہوں گے۔
مرتضیٰ وہاب نے مصطفیٰ کمال پر بھی تنقید کی اور کہا کہ انہوں نے 11 ہزار دکانیں بنا کر چائنا کٹنگ کی، جس کے باعث اب وہ لوگ مشکلات کا شکار ہیں۔
آخر میں، میئر کراچی نے مرحوم عامر لیاقت کا حوالہ دیتے ہوئے کہا کہ میٹھا میٹھا ہپ ہپ، کڑوا کڑوا تھو تھو کی پالیسی اب مزید نہیں چلے گی، کراچی کے لیے سنجیدگی سے کام کرنا ہوگا۔