نیوزی لینڈ نے چوتھے ٹی ٹوئنٹی انٹرنیشنل میں پاکستان کو 115 رنز سے شکست دے کر سیریز اپنے نام کرلی۔ 221 رنز کے ہدف کے تعاقب میں پاکستانی ٹیم 105 رنز پر ڈھیر ہوگئی، اور 9 کھلاڑی ڈبل فگر میں داخل نہ ہو سکے۔
ٹرمپ کی قانونی وکلا کے خلاف کارروائی کی دھمکی، قانونی تنظیموں کا ردِ عمل
ماؤنٹ مانگا نوئی میں کھیلے گئے اس میچ میں پاکستان نے ٹاس جیت کر پہلے فیلڈنگ کا فیصلہ کیا، تاہم کیوی بلے بازوں نے شاندار کھیل کا مظاہرہ کرتے ہوئے مقررہ 20 اوورز میں 6 وکٹوں کے نقصان پر 220 رنز بنا ڈالے۔ جواب میں پاکستان کی بیٹنگ لائن مکمل طور پر ناکام رہی اور پوری ٹیم 105 رنز پر آؤٹ ہوگئی۔
پاکستان کی بیٹنگ لائن بے بسی کا شکار
پاکستان کی اننگز کا آغاز تباہ کن انداز میں ہوا، جہاں محمد حارث 2، حسن نواز، سلمان علی آغا اور شاداب خان ایک ایک رن بنا کر آؤٹ ہوگئے۔ عرفان خان 24 رنز بنا کر کچھ مزاحمت کر سکے، جبکہ خوشدل شاہ 6 اور عباس آفریدی بھی صرف 1 رن بنا کر پویلین لوٹ گئے۔ عبدالصمد 44 رنز کے ساتھ نمایاں رہے، جبکہ شاہین شاہ آفریدی اور حارث رؤف 6،6 رنز بنا سکے۔
نیوزی لینڈ کے باؤلرز کی شاندار کارکردگی
کیوی ٹیم کے باؤلرز نے بہترین کارکردگی کا مظاہرہ کیا۔ جیکب ڈفی نے 4، زکرے فولکس نے 3 جبکہ وِل اورورکی، اش سوڈھی اور جیمز نیشم نے ایک ایک وکٹ حاصل کی۔
کیوی بلے بازوں کا جارحانہ کھیل
پہلی اننگز میں نیوزی لینڈ کے بلے بازوں نے شاندار آغاز فراہم کیا اور محض 3.5 اوورز میں 50 رنز مکمل کرلیے۔ ٹم سیفرٹ نے 22 گیندوں پر 44 رنز بنائے، جبکہ فن ایلن نے 20 گیندوں پر 50 رنز کی برق رفتار اننگز کھیلی۔
نیوزی لینڈ نے مقررہ 20 اوورز میں 220 رنز اسکور کیے، جہاں مائیکل بریس ویل 44 اور زکرے فولکس 3 رنز بنا کر ناٹ آؤٹ رہے۔
سیریز میں نیوزی لینڈ کی فیصلہ کن برتری
اس فتح کے ساتھ نیوزی لینڈ نے پانچ میچوں کی سیریز میں 1-3 کی فیصلہ کن برتری حاصل کرلی۔ نیوزی لینڈ نے پہلے اور دوسرے ٹی 20 میں پاکستان کو بالترتیب 9 اور 5 وکٹوں سے شکست دی تھی، جبکہ تیسرے ٹی 20 میں پاکستان نے حسن نواز کی شاندار سنچری کی بدولت 9 وکٹوں سے کامیابی حاصل کی تھی۔