پاکستان تحریک انصاف (پی ٹی آئی) کی چیف آرگنائزر عالیہ حمزہ نے وزیراعلیٰ پنجاب، چیف سیکریٹری اور دیگر حکام کو خط لکھ کر پنجاب حکومت کی تشہیری مہم کے فنڈز کی تفصیلات طلب کر لی ہیں۔
سندھ حکومت کا فاروق ستار کے الزامات پر سخت ردعمل، شرجیل میمن کی وضاحت
سرکاری فنڈز کا سیاسی استعمال؟
خط میں مؤقف اختیار کیا گیا ہے کہ پنجاب حکومت اپنی کارکردگی دکھانے کے لیے اخبارات میں اشتہاری مہم چلا رہی ہے، جو کہ سیاسی تشہیر کے مترادف ہے۔ عالیہ حمزہ نے نشاندہی کی کہ سپریم کورٹ کے احکامات کے مطابق سرکاری فنڈز کو سیاسی مقاصد کے لیے استعمال نہیں کیا جا سکتا۔
اشتہارات پر کتنی رقم خرچ ہوئی؟
خط میں سوال اٹھایا گیا ہے کہ سرکاری اشتہارات کے لیے کتنی رقم خرچ کی گئی اور آیا اس مہم کی منظوری صوبائی کابینہ سے لی گئی یا نہیں؟ ساتھ ہی مطالبہ کیا گیا کہ اشتہاری مہم پر آنے والے تمام اخراجات کی تفصیلات فراہم کی جائیں۔
پنجاب حکومت کی ایک سالہ کارکردگی کی تشہیر
واضح رہے کہ پنجاب حکومت نے حال ہی میں اپنی ایک سالہ کارکردگی کی تشہیر کے لیے بڑے پیمانے پر اخباری اشتہارات دیے، یہاں تک کہ ایک قومی روزنامے نے 60 صفحات پر مشتمل خصوصی ضمیمہ بھی شائع کیا تھا۔
سوشل میڈیا پر شدید ردعمل
اخبارات میں حکومتی اشتہارات شائع ہونے پر سوشل میڈیا صارفین نے حکومت اور اخباری انتظامیہ کو شدید تنقید کا نشانہ بنایا، اور سرکاری فنڈز کے اس استعمال پر سوالات اٹھائے گئے۔