کراچی: ائیرپورٹس سیکیورٹی فورس کی بنیادی ایوی ایشن سیکیورٹی کورس کی پاسنگ آؤٹ پریڈ کی تقریب اے ایس ایف اکیڈمی کراچی میں منعقد ہوئی۔ اس کورس میں 655 نئے بھرتی شدہ مرد و خواتین نے تربیت حاصل کی۔ تربیت کے دوران، ریکروٹس کو نہ صرف ایوی ایشن سیکیورٹی کے جدید طریقہ ہائے کار سکھائے گئے بلکہ جسمانی طور پر سخت اور کٹھن مراحل سے گزارا گیا تاکہ وہ کسی بھی مشکل صورتِ حال سے نمٹنے کے قابل ہوں۔
گورنر خیبرپختونخوا فیصل کریم کنڈی سے پاکستان آبزرور کے چیئرمین فیصل زاہد ملک کی ملاقات
تقریب میں کور کمانڈر کراچی لیفٹننٹ جنرل محمد اویس دستگیر ہلالِ امیتاز (ملٹری)، ستارہ امتیاز نے بطور مہمان خصوصی شرکت کی۔ کور کمانڈر کی آمد پر پریڈ کی جانب سے انہیں جنرل سلامی پیش کی گئی۔
کور کمانڈر نے ڈائریکٹر جنرل ائیرپورٹس سیکیورٹی فورس، میجر جنرل عدنان آصف جاہ شاد کے ہمراہ پریڈ کا معائنہ کیا اور اعلٰی کارکردگی کا مظاہرہ کرنے والے ٹرینیز میں انعامات اور میڈلز تقسیم کیے۔
خطاب کے دوران، کور کمانڈر نے ائیرپورٹس سیکیورٹی فورس کی جانب سے ملکی ہوائی اڈوں کی فول پروف سیکیورٹی اور امن و امان کے سلسلے میں کی جانے والی کاوشوں کو سراہا۔ انہوں نے ائیرپورٹس سیکیورٹی فورس کے شہدا کو خراجِ عقیدت بھی پیش کیا۔
تقریب کے اختتام پر، کور کمانڈر کراچی نے ٹریننگ مکمل کرنے والے ریکروٹس اور ان کے والدین کو مبارکباد دی اور اس امید کا اظہار کیا کہ وہ ائیرپورٹس سیکیورٹی فورس کی افرادی قوت میں ایک مثبت اضافہ ثابت ہوں گے۔
